কিমাশ্চৰ্যম! অভিযোগ অনুসৰি মন্দিৰৰ ভিতৰত ছোৱালীৰ ওপৰত যৌন নিৰ্যাতন চলাইছিল পুৰোহিতে। কেতিয়াবা প্ৰসাদৰ লোভ দেখুৱাই নাবালিক ছোৱালীবোৰক মন্দিৰৰ ভিতৰলৈ লৈ গৈছিল।এই ঘটনা সন্দৰ্ভত তামিলনাডুত আৰক্ষীয়ে আটক কৰে ৭০ বছৰীয়া পুৰোহিতজনক।
তামিলনাডুৰ থেনি জিলাৰ পেৰিয়ায়াকুলামত সংঘটিত হৈছে এই ঘটনা। এই ঘটনাত অঞ্চলটোত পৰিস্থিতি উত্তেজিত হৈ পৰিছে। স্থানীয় ৰাইজে মন্দিৰ ঘেৰাও কৰি প্ৰতিবাদ সাব্যস্ত কৰে। এই তথ্য লাভ কৰাৰ পাছতে আৰক্ষী সেই স্থানত উপস্থিত হয়। পুৰোহিতজনক গ্ৰেপ্তাৰ কৰা হৈছে। তেওঁৰ বিৰুদ্ধে POCSO আইনৰ অধীনত গোচৰ ৰুজু কৰা হৈছে।
আৰক্ষীৰ সূত্ৰ অনুসৰি মন্দিৰৰ বাহিৰত খেলা-ধূলা কৰি আছিল একাংশ শিশু। তেতিয়া মন্দিৰৰ সত্তৰ বছৰীয়া পুৰোহিতজনে আহি প্ৰসাদ মিঠাই আগবঢ়াবলৈ প্ৰলোভিত কৰি তেওঁলোকক ভিতৰলৈ মাতিলে। ইয়াৰ পিছত যৌন নিৰ্যাতন চলোৱাৰ অভিযোগ উত্থাপন হৈছে। ইয়াৰ উপৰিও অভিযোগ কৰা হৈছে যে এইটো প্ৰথমবাৰৰ বাবে নহয়, ইয়াৰ পূৰ্বেও তেওঁ এনে কাম কৰিছে। যেতিয়া ছোৱালীজনীয়ে ঘৰতে সমগ্ৰ ঘটনাৰ খবৰ দিয়ে তেতিয়া ছোৱালীজনীৰ পৰিয়াল আৰু অন্যান্য আত্মীয়ই মন্দিৰ এলেকাত সমবেত হয়। খবৰটো ওলোৱাৰ লগে লগে অঞ্চলটোত চাঞ্চল্যৰ সৃষ্টি হ’ল। স্থানীয় লোকেও মন্দিৰ চৌহদত সমবেত হয়। ভয়ত মন্দিৰৰ গেটত তলা লগাই ভিতৰত আত্মগোপন কৰি আছিল অভিযুক্তই। পৰিস্থিতি উত্তপ্ত হৈ পৰাত স্থানীয় আৰক্ষীয়ে আহি গ্ৰেপ্তাৰ কৰে।বৰ্তমান পুৰোহিতজনৰ জেৰা চলি আছে।
