Daler Mehndi gets jail কাৰাবন্দী হ’ল জনপ্ৰিয় পাঞ্জাৱী ভাংৰা শিল্পী দালেৰ মেহেন্দি। ২০০৩ চনত দেশ কঁপাই যোৱা মানৱ সৰৱৰাহ গোচৰত কাৰাবাস খাটিব লাগিব জনপ্ৰিয় শিল্পীজনে। সুদীৰ্ঘ ১৯ বছৰৰ পাছত পাটিয়ালাৰ আদালতে আজি তেওঁক গ্ৰেপ্তাৰৰ আদেশ দিয়ে।
ভাৰতীয় দণ্ডবিধিৰ ৪০৬, ৪২০, ১২০বি, ৪৬৫, ৪৬৮ আৰু ৪৭১ ধাৰা অনুসৰি দোষী সাব্যস্ত কৰা হৈছে তেওঁক। সেই অনুসৰি, দুবছৰ ধৰি কাৰাগাৰত থাকিব লাগিব দালেৰ মেহেন্দি।
উল্লেখযোগ্য যে দালেৰ মেহেন্দিৰ সংগীতগোষ্ঠীৰ স’তে অনুষ্ঠান পৰিৱেশন কৰিবলৈ বিদেশলৈ নিয়াৰ টোপ দি মানৱ সৰৱৰাহ কৰাৰ অভিযোগ উঠিছিল দালেৰ মেহন্দীৰ ভাতৃ সামশ্বেৰ মেহন্দিৰ ওপৰত। তাত খোদ দালেৰ মেহেন্দিও জড়িত থকাৰ অভিযোগ উঠে।
২০০৩ চনত এই সংক্ৰান্তত এটা গোচৰ ৰুজু কৰা হয়। অভিযোগকাৰী বকশিস সিঙে দাবী কৰিছিল যে অনুষ্ঠান কৰিবৰ বাবে বিদেশলৈ নিয়াৰ যি চুক্তি কৰা হৈছিল, সেয়া কেতিয়াও বাস্তৱায়িত হোৱা নাছিল।
২০১৭ চনত সামশ্বেৰ মেহেন্দিৰ মৃত্যু হয়। তাৰপাছতে ২০১৮ চনত দালেৰ মেহন্দিক গোচৰটোত দোষী সাব্যস্ত কৰা হৈছিল যদিও জামিনত মুক্তিলাভ কৰিছিল।
এতিয়া তেওঁক দুবছৰ কাৰাবাস প্ৰদান কৰা বিষয়টোৱে ব্যাপক চৰ্চা লাভ কৰা দেখা গৈছে।
