আবকাৰী নীতি কেলেংকাৰীৰ অভিযোগত চিবিআইয়ে গ্ৰেপ্তাৰ কৰা দিল্লীৰ উপ মুখ্যমন্ত্ৰী মনীষ ছিছ’দিয়াক আদালতে ৪ মাৰ্চলৈ ৰিমাণ্ডত প্ৰেৰণ কৰিছে। এই গোচৰত চিবিআইয়ে ছিছ’দিয়াক ৫ দিনৰ জিম্মাত বিচাৰি আবেদন কৰিছিল আৰু আদালাতে সেই আবেদনকে মঞ্জুৰ কৰে।
উল্লেখ্য যে যোৱা দেওবাৰে সন্ধিয়া ২০২১-২২ বৰ্ষৰ আবকাৰী নীতি যিখন পিছলৈ বাতিল কৰা হৈছিল সেইখনত দুৰ্নীতি সংঘটিত কৰাৰ অভিযোগত ছিছ’দিয়াক চিবিআইয়ে গ্ৰেপ্তাৰ কৰিছিল।
ইয়াৰ পাছতে সোমবাৰে ৰাউছ এভিনিউ আদালতত চিবিআইয়ে মনীষ ছিছ’দিয়াক হাজিৰ কৰোৱায় পাঁচ দিনৰ জিম্মাত বিচাৰে। চিবিআইয়ে অভিযোগ কৰিছে যে ছিছ’দিয়াই সুৰা কেলেংকাৰীত অপৰাধমূলক ষড়যন্ত্ৰ ৰচনা কৰাৰ লগতে প্ৰমাণ ধ্বংস কৰাৰ চেষ্টাও কৰিছিল।
ছিছ’দিয়াক গ্ৰেপ্তাৰ কৰি চিবিআইৰ মুখ্য কাৰ্যালয়ত ৰখা হৈছে আৰু চিকিৎসকৰ দল এটা মাতি তাতে তেওঁৰ স্বাস্থ্য পৰীক্ষাও কৰা হয়।
ইফালে মনীষ চিছ’দিয়াক গ্ৰেপ্তাৰ কৰাৰ বিৰুদ্ধে আম আদমি পাৰ্টিয়ে দেশজুৰি প্ৰতিবাদ সাব্যস্ত কৰিছে।
