‘উত্তৰ-পূৰ্বাঞ্চলৰ ৰাইজ অকলশৰীয়া নহয়, শিৱসেনা উত্তৰ-পূৰ্বাঞ্চলৰ ৰাইজৰ লগত আছে।‘ বুধবাৰে মুম্বাইৰ মাতশ্ৰীস্থিত বাসগৃহত সদৌ অসম ছাত্ৰ সন্থা আৰু উত্তৰ পূব ছাত্ৰ সন্থা(নেছ’)ৰ এটা সজাতি দলে শিৱসেনাৰ প্ৰধান উদ্ধৱ থাকৰে আৰু তেওঁৰ পুত্ৰ আদিত্য থাকৰেক সাক্ষাতৰ সময়ত এইদৰে প্ৰতিশ্ৰুতি দিয়ে।
উল্লেখ্য যে, বিজেপিয়ে চলিত বাজেট অধিৱেশনত নাগৰিকত্ব সংশোধনী বিধেয়কখন ৰাজ্যসভাত যাতে গৃহীত কৰাব নোৱাৰে তাৰ বাবে ইতিমধ্যে বিৰোধী দল কংগ্ৰেছকে ধৰি অন্যান্য দল-সংগঠনক সাক্ষাৎ কৰিছে আছু-নেছ’ নেতৃত্বই।
আনহাতে, আজি শিৱসেনাৰ দুগৰাকীকৈ মুখ্য নেতাক সাক্ষাতৰ সময়ত তেওঁলোকে ৰাজ্যসভাত সম্পূৰ্ণৰূপে বিধেয়কখনৰ বিৰোধিতা কৰিব বুলিও প্ৰতিশ্ৰুতি প্ৰদান কৰে।
ইপিনে, ৰাষ্ট্ৰীয় পৰ্য্যায়ত সহমত প্ৰস্তুত কৰাৰ বাবে শিৱসেনাই চেষ্টা অৱ্যাহত ৰাখিব বুলি জানিবলৈ দিয়া কথা সদৌ অসম ছাত্ৰ সন্থাৰ সভাপতি দীপাংক নাথে নৰ্থ ইষ্ট নাওক জনায়।
‘’এইটো এটা ৰাষ্ট্ৰীয় পৰ্য্যায়ৰ ইচ্ছ্যু, দেশৰ নাগৰিকৰ স্বাৰ্থ বিঘ্নিত কৰি বিদেশীৰ স্বাৰ্থ সুৰক্ষিত কৰিব খোজা প্ৰচেষ্টাক শিৱসেনাই বাধা দিব।‘’ দীপাংক নাথে এইদৰে কয়।
তদুপৰি, শিৱসেনাই ৰাজ্যসভাত হাতে-কামে এই জাতিধ্বংসী বিলখনৰ বিৰোধিতা কৰিব বুলিও তেওঁ জানিবলৈ দি লগতে কয় যে সংসদত উপস্থিত থাকি শিৱসেনাৰ সাংসদসকলে বিলৰ বিৰোধিতা কৰিব।
তেওঁলোকৰ সম-পৰ্য্যায়ৰ যিখিনি বিৰোধী ৰাজনৈতিক দল আছে, তেওঁলোকৰ সৈতে আলোচনা কৰি পতিয়ন নিয়াবৰ বাবে চেষ্টা কৰিব বুলি আছু আৰু নেছ’ৰ নেতৃত্বক আশ্বাস প্ৰদান কৰে।
আনহাতে, ৰাজ্যসভাৰ সকলো বিৰোধী দলৰ সাংসদক একেমুখে বিধেয়কখন বিৰোধিতা কৰিবলৈ আহ্বান জনাই দীপাংক নাথে কয় যে বিৰোধী সকলোৱে একগোট হৈ ৰাজ্যসভাত নাগৰিকত্ব সংশোধনী বিধেয়কখনৰ বিপক্ষে ভোট দিবৰ বাবে সাজু হৈ থাকিব লাগে। লগতে বিৰোধী দলসমূহক সদন ত্যাগ নকৰিবৰ বাবেও আহ্বান জনায় দীপাংক নাথে।
‘‘যিসকলে বিধেয়কখনৰ বিৰোধিতা কৰিব তেওঁলোকে সদনত উপস্থিত থাকি বিধেয়কখনৰ বিৰোধিতা কৰিব লাগে।‘’ এইদৰে কয় নাথে।
বুধবাৰে নেছ’ৰ উপদেষ্টা সমুজ্জ্বল কুমাৰ ভট্টাচাৰ্য্যৰ নেতৃত্বত যোৱা সজাতি দলটোত আছুৰ সাধাৰণ সম্পাদক লুৰিণজ্যোতি গগৈ, নেছ’ৰ সভাপতি ছেমুৱেল জেৰৱাকে ধৰি অন্যান্য প্ৰতিনিধিবৰ্গই শিৱসেনাক সাক্ষাৎ কৰে।
প্ৰসংগক্ৰমে উল্লেখ কৰিব পাৰি যে, বিজেপিৰ সৈতে মিত্ৰতাত থকা শিৱসেনাক পূৰ্বতেও অগপ নেতৃত্বই সাক্ষাৎ কৰি নাগৰিকত্ব সংশোধনী বিধেয়কখনৰ বিৰোধিতা কৰিবৰ বাবে আহ্বান জনাইছিল।
