প্ৰাক্তন শিক্ষক, সমাজকৰ্মী বংশীধৰ শইকীয়াৰ মৃত্যু : প্ৰফুল্ল কুমাৰ মহন্তৰ শোক-প্ৰকাশ

নগাঁও জিলাৰ পুৰণিগুদাম জলাহগাঁৱৰ প্ৰাক্তন শিক্ষক, সমাজকৰ্মী তথা শাস্ত্ৰজ্ঞ ব্যক্তি বংশীধৰ শইকীয়াৰ (৮৫) আজি বিয়লি প্ৰায় ৪ বজাত পৰলোকপ্ৰাপ্তি হয়। বিভিন্ন সামাজিক, সাংস্কৃতিক কাম-কাজৰ লগত জড়িত প্ৰাক্তন শিক্ষক গৰাকীৰ আকস্মিক মৃত্যুত সমগ্ৰ অঞ্চলটোতে শোকৰ ছাঁ পৰিছে।

তেওঁৰ মৃত্যুৰ খবৰ বিয়পি পৰাৰ লগে-লগে অসংখ্য গুণমুগ্ধই শইকীয়াৰ বাসগৃহত উপস্থিত হৈ অন্তিম শ্ৰদ্ধা জ্ঞাপন কৰাৰ লগতে সম্পূৰ্ণ ধৰ্মীয় পৰম্পৰাৰে এক শোভাযাত্ৰা কৰি তেওঁৰ মৃতদেহ অন্তিম সৎকাৰৰ বাবে লৈ যায়৷

মৃত্যুৰ সময়ত বংশীধৰ শইকীয়াই সহধৰ্মিনী, দুই পুত্ৰ, বোৱাৰী আৰু নাতি-নাতিনীসহ বহু আত্মীয় স্বজনক ইহঃ সংসাৰত এৰি থৈ যায়।

তেওঁৰ মৃত্যুত অঞ্চলৰ বিভিন্ন অনুষ্ঠান-প্ৰতিষ্ঠানৰ লগতে ৰাজ্যৰ প্ৰাক্তন মুখ্য মন্ত্ৰী তথা বঢ়মপুৰ সমষ্টিৰ বিধায়ক প্ৰফুল্ল কুমাৰ মহন্ত, অগপ নেতা নিৰঞ্জন বৰাৰ লগতে অসম গণ পৰিষদ দলৰ বহুসংখ্যক নেতায়ে গভীৰ শোক প্ৰকাশ কৰি শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছে৷