বলীউডৰ জনপ্ৰিয় অভিনেতা তথা মানৱ দৰদী সমাজসেৱক চনু সুদ পুনৰ এবাৰ নিজৰ ব্যতিক্ৰমী কৰ্মৰ বাবে চৰ্চালৈ আহিছে। ক’ভিদকালীন সময়চোৱাত দেশৰ বিভিন্ন প্ৰান্তৰ শ্ৰমিকসকলক নিজৰ ঘৰলৈ উভতাই পঠিয়াবলৈ গ্ৰহণ কৰা পদক্ষেপৰ বাবে বিশ্বজুৰি প্ৰশংসিত হৈছিল চনু সুদ। ইয়াৰ পাছতো অভিনেতাগৰাকীয়ে অব্যাহত ৰাখিছে নিজৰ মানৱ দৰদী কাৰ্য।
এইবাৰ চনু সুদে দেশৰ প্ৰশাসনিক সেৱাৰ বাবে প্ৰস্তুতি চলাই থকা শিক্ষাৰ্থীসকলৰ বাবে আৰম্ভ কৰিছে বিনামূলীয়া অনলাইন প্ৰশিক্ষণ ক্লাছ। ডিভাইন ইণ্ডিয়া য়ুথ এছ’চিয়েশ্যনৰ নামৰ এটা সংস্থাৰ সৈতে একেলগে ‘সম্ভাৱম ২০২২-২৩’ নামৰ বিনামূলীয়া অনলাইন প্ৰশিক্ষণ ক্লাছ আৰম্ভ কৰিছে সুদে।
‘সম্ভাৱম’ৰ অধীনত নিৰ্বাচিত শিক্ষাৰ্থীসকলে ভাৰতৰ শীৰ্ষ অসামৰিক সেৱা প্ৰতিষ্ঠানসমূহত বিনামূলীয়া অনলাইন আইএএছ প্ৰশিক্ষণ লাভ কৰাৰ সুযোগ পোৱাৰ লগতে যুৱ সৱলীকৰণ আৰু ৰাষ্ট্ৰ নিৰ্মাণৰ বাবে নতুন সম্ভাৱনা মুকলি কৰিব বুলি সুদ চেৰিটি ফাউণ্ডেচনে নিজৰ অফিচিয়েল ৱেবছাইটত উল্লেখ কৰিছে।
সম্ভাৱম ২০২২-২৩ ৰ অধীনত ডিভাইন ইণ্ডিয়া য়ুথ এছ’চিয়েশ্যনৰৰ সৈতে সুদ চেৰিটি ফাউণ্ডেচনে নিৰ্বাচিত সকলক আই.এ.এছ. পৰীক্ষাৰ বাবে বিনামূলীয়া অনলাইন প্ৰশিক্ষণ প্ৰদান কৰিব।
ইচ্ছুক প্ৰাৰ্থীসকলে ৫০ টকা পঞ্জীয়ন মাচুল পৰিশোধ কৰি ‘সম্ভাৱম ২০২২-২৩’ ৰ বাবে পঞ্জীয়ন কৰিব পাৰিব। এই মাচুল পৰিশোধ কৰাৰ পাছত অৱশ্যে ‘সম্ভাৱম ২০২২-২৩’ ৰ বৃত্তি বিনামূলীয়া হ’ব। প্ৰাৰ্থীসকলে অহা ২৫ ছেপ্টেম্বৰলৈকে এই প্ৰশিক্ষণৰ বাবে আবেদন কৰিব পাৰিব।
