ভাৰতৰ ঘৰুৱা ক্ৰিকেটৰ মহান বেটছমেন তথা কেইবাটাও ৰেকৰ্ডৰ অধিকাৰী অমল মজুমদাৰক দক্ষিণ আফ্ৰিকাৰ বেটিং প্ৰশিক্ষক হিচাপে নিযুক্তি দিছে।
ঘৰুৱা ক্ৰিকেটত ৩০টা শতকেৰে ১১১৬৭ ৰান বনোৱা ৪৪ বছৰীয়া ক্ৰিকেটাৰ গৰাকীয়ে নিজে এই কথা সংবাদ মাধ্যমৰ আগত প্ৰকাশ কৰে।
অমল মজুমদাৰে কয়, ‘যোৱা সপ্তাহত মোক যোগাযোগ কৰিছিল আৰু এই প্ৰত্যাহ্বান গ্ৰহণ কৰিবলৈ মই লগে লগে সাজু হৈছিলো’।
‘উচ্চ পৰ্যায়ৰ আন্তঃৰাষ্ট্ৰীয় ক্ৰিকেট দল এটাৰ সৈতে জড়িত হ’বলৈ পোৱাটো সন্মানৰ বিষয়’। এই মন্তব্য মুম্বাইৰ হৈ ৰঞ্জি খেলা অমল মজুমদাৰৰ।
উল্লেখ্য যে কেৰিয়াৰৰ অধিকতম সময় মুম্বাইৰ হৈয়ে ঘৰুৱা ক্ৰিকেট খেলা অমলে ৰঞ্জি ক্ৰিকেটত অসমকো প্ৰতিনিধিত্ব কৰিছিল। ক্ৰিকেটাৰ গৰাকীয়ে অৱসৰ লৈছিল অসম দলৰ পৰা।
ফাৰ্ষ্ট ক্লাছৰ উপৰি মজুমদাৰে লিষ্ট-এ ক্ৰিকেটতো বহু ৰান সংগ্ৰহ কৰিছিল।
তেওঁৰ বাবে বেটিং প্ৰশিক্ষকৰ দায়িত্ব এয়া প্ৰথম নহয়। ইয়াৰ পূৰ্বে মজুমদাৰে আই পি এলত ৰাজস্থান ৰয়েলছ দলৰ বেটিং প্ৰশিক্ষক হিচাপেও দায়িত্বত আছিল।
ঘৰুৱা ক্ৰিকেটত অনবদ্য অৱদান আগবঢ়োৱাৰ পাছতো ৰাষ্ট্ৰীয় দলৰ জাৰ্ছি পৰিধান কৰিবলৈ নোপোৱা ক্ৰিকেটাৰ গৰাকীয়ে আগন্তুক ২ অক্টোবৰৰ পৰা ভাৰতৰ বিৰুদ্ধে হ’ব লগা টেষ্ট শৃংখলাত দক্ষিণ আফ্ৰিকাৰ বেটিং প্ৰশিক্ষক হিচাপে দায়িত্বত থাকিব।
