চেম্পিয়নছ ট্ৰফীৰ ছেমি ফাইনেলৰ বাবে চাৰিটা দল চূড়ান্ত হৈছে। গ্ৰুপৰ অন্তিমখন খেলত ইংলেণ্ডক পৰাস্ত কৰি দক্ষিণ আফ্ৰিকাই অন্তিম চাৰিটা দলত স্থান দখল কৰে। দক্ষিণ আফ্ৰিকাই কেৱল শেষ চাৰিটাত স্থান লাভ কৰাই নহয়, শীৰ্ষৰ পৰা শেষ চাৰিটালৈও স্থান লাভ নিশ্চিত কৰে। দক্ষিণ আফ্ৰিকাই শনিবাৰে ইংলেণ্ডক ৭ উইকেটত পৰাস্ত কৰে।
ইতিমধ্যে আফগানিস্তানৰ হাতত পৰাস্ত হৈ ইংলেণ্ড চেম্পিয়নছ ট্ৰফীৰ পৰা বাহিৰ হৈছে। সেইদিনাৰ পৰাজয়ত বাটলাৰৰ দল যে কিমান বিধ্বস্ত হৈ পৰিছে সেয়া শনিবাৰে তেওঁলোকৰ শৰীৰৰ ভাষাত দেখা গৈছিল। ইংলেণ্ড দলৰ মাজত বিজয়ৰ ক্ষুধা নাছিল।
প্ৰথমে বেটিং কৰি মেককালাম ব্ৰিগেডে মাত্ৰ ১৭৯ ৰান সংগ্ৰহ কৰি অল আউট হয়। জো ৰুট (৩৭), বেন ডাকেট (২৪), আৰু জোছ বাটলাৰে (২১) ইনিংছটো ভালকৈ আৰম্ভ কৰিছিল যদিও তেওঁলোকৰ কোনোৱেই ডাঙৰ ইনিংছ গঢ়ি তুলিব পৰা নাছিল। দক্ষিণ আফ্ৰিকাৰ হৈ মাৰ্কো জান্সেন আৰু মুল্ডাৰে ৩টাকৈ উইকেট দখল কৰে।
ইয়াৰ উত্তৰত দক্ষিণ আফ্ৰিকাই ভাল আৰম্ভণি নকৰিলেও ভ্যান ডেৰ ডুচেন আৰু ক্লাচেনৰ পাৰ্টনাৰশ্বিপৰ ওপৰত নিৰ্ভৰ কৰি মাত্ৰ ২৯ অভাৰ আৰু ১ টা বলত লক্ষ্যত উপনীত হয়। ভেন ডেৰ ডুচেনে ৭২ আৰু ক্লাচেনে ৬৪ ৰান সংগ্ৰহ কৰে। দক্ষিণ আফ্ৰিকাই ৩টা উইকেট হেৰুৱাই সহজেই জয়লাভ কৰে।
দক্ষিণ আফ্ৰিকা অৱশ্যে খেলখনৰ প্ৰথম ইনিংছৰ শেষতে ছেমি ফাইনেলত নিশ্চিত হৈছিল। আফগানিস্তানে ছেমি ফাইনেলত প্ৰৱেশ কৰিবলৈ হ’লে ইংলেণ্ডে কমেও ২০৮ ৰানত জয়লাভ কৰিবলগীয়া আছিল। অৱশ্যে ইংৰাজ দলটোৱে প্ৰথম ইনিংছত মাত্ৰ ১৭৯ ৰানহে সংগ্ৰহ কৰে। ইয়াৰ পিছত নিশ্চিত হয় যে অষ্ট্ৰেলিয়া আৰু দক্ষিণ আফ্ৰিকাই গ্ৰুপ ২ৰ পৰা ছেমি ফাইনেলত প্ৰৱেশ কৰিব।
ইংলেণ্ডক পৰাস্ত কৰি দক্ষিণ আফ্ৰিকাই গ্ৰুপৰ শীৰ্ষস্থান দখল কৰাৰ বিপৰীতে অষ্ট্ৰেলিয়াই দ্বিতীয় স্থান লাভ কৰে। দেওবাৰে যদি ভাৰতে নিউজিলেণ্ডক পৰাস্ত কৰে তেন্তে গ্ৰুপত শীৰ্ষস্থান দখল কৰিব ভাৰতে। তেনে ক্ষেত্ৰত ছেমি ফাইনেলত প্ৰতিদ্বন্দ্বী দল হ’ব অষ্ট্ৰেলিয়া। আৰু দেওবাৰে যদি ৰোহিত বাহিনী পৰাস্ত হয় তেন্তে দ্বিতীয় স্থানত থাকিব টিম ইণ্ডিয়া। তেনে ক্ষেত্ৰত ছেমি ফাইনেলৰ প্ৰতিদ্বন্দ্বী হ’ব দক্ষিণ আফ্ৰিকা।
সংক্ষিপ্ত স্কোৰঃ
ইংলেণ্ড: ১৭৯ (ৰুট ৩৭, আৰ্চাৰ ২৫)
দক্ষিণ আফ্ৰিকা: ১৮১-৩ (ভান ডেৰ ডুচেন ৭২, ক্লাচেন ৬৪)
দক্ষিণ আফ্ৰিকাই ৭ উইকেটত জয়লাভ কৰে।
