আৰম্ভ হ’ল উত্তৰ-পূবৰ বিখ্যাত ‘আদা ফেষ্টিভেল’
বৃহস্পতিবাৰৰ পৰা মনিপুৰৰ ৰাজধানী ইম্ফলৰ পৰা ২৪০ কিলোমিটাৰ আটৰৰ ফেৰজাৱল জিলাত অনুষ্ঠিত হৈছে ৰাজ্যিক পৰ্যায়ত ‘আদা মহোৎসব’। জিলাখনৰ উপায়ুক্ত মানুৱামচিঙে দ্বিতীয় আদা মহোৎসবখনি আনুষ্ঠানিক ভাবে উদ্বোধন কৰে।
মহোৎসব খনিৰ উদ্বোধনী অনুষ্ঠানত উপস্থিত থাকে স্বায়ত্ত শাসিত জিলা পৰিষদৰ চৌৰাচান্দপুৰৰ সদস্য লালহামাংপুই, মনিপুৰ জৈবিক অভিযান এজেঞ্চিৰ প্ৰকল্প সঞ্চালক দেৱদত্ত শৰ্মা, ক্ল’ভাৰ জৈবিক প্ৰাইভেট লিমিটেডৰ ৰাজ্যিক মেনেজাৰ ফাইয়ামফু খামচাংলিম, পৰিচালন সঞ্চালক চাণ্টা নাহাকপামলং আদিকে ধৰি ভালে সংখ্যক আগশাৰীৰৰ ব্যক্তি।
অনুষ্ঠানত অংশগ্ৰহণ কৰি উপায়ুক্ত মানুৱাচিঙে ৰাজ্যখনৰ কৃষকসকলক প্ৰশংসা কৰি কয় যে কৃষক সকলে এনেধৰণৰ ঔষধি গুণ সম্পন্ন শস্যৰ খেতিৰে ৰাজ্যৰ কৃষি ক্ষেত্ৰত নতুন দিগন্তৰ সূচনা কৰিব। লগতে ৰাজ্যচৰকাৰে কৃষক সকলৰ বাবে আৰু উৎপাদিত সামগ্ৰী সমূহ বিক্ৰীৰ বাবে বিশেষ ব্যবস্থা গ্ৰহণ কৰিব লাগিব বুলি মন্তব্য কৰে।
উপায়ুক্তগৰাকীয়ে জৈবিক পদ্ধতিৰ কৃষি প্ৰণালীৰ বিষয়ে উল্লেখ কৰি কয় যে জৈবিক পদ্ধতিৰে কৃষি কৰি পৰিবেশ প্ৰদূষণ ৰোধ কৰাৰ লগতে উৎপাদনো বৃদ্ধি কৰিব পৰা যায়।
আনহাতে, মহোৎসবখনিয়ে স্থানীয় কৃষক সকলক এখন বৃহৎ বজাৰৰ সম্ভাৱনীয়তাক মুকলি কৰি দিব বুলি ভাষণত উল্লেখ কৰি জৈবিক কৃষি পদ্ধতিক অন্যান্য জিলা সমূহলৈ প্ৰসাৰ কৰাৰ বাবে আহ্বান জনায়।
উদ্বোধনী অনুষ্ঠানত স্থানীয় শিল্পী সকলৰ দ্বাৰা সাংস্কৃতিক অনুষ্ঠান পৰিবেশন কৰা হয়। শুক্ৰবাৰে ব্যৱসায়ী আৰু কৃষকসকলৰ মাজত বাণিজ্যিক বৈঠক অনুষ্ঠিত হ’ব।