পশ্চিম বংগৰ পঞ্চায়ত নিৰ্বাচনৰ ভোটগ্ৰহণৰ সময়ত দুস্কৃতিকাৰীয়ে চুৰি কৰা বেলট বাকচৰ ভিতৰত দুটা বেলট বাকচ অসমৰ ধুবুৰী জিলাৰ গোলকগঞ্জ চহৰত উদ্ধাৰ হৈছে।
বাতৰি অনুসৰি, দেওবাৰে (০৯ জুলাই) ধুবুৰী জিলাৰ গোলকগঞ্জ চহৰৰ এটা পুখুৰীৰ পৰা উদ্ধাৰ কৰা হয় বেলট বাকচ দুটা।
কেন্দ্ৰীয় সংৰক্ষিত আৰক্ষী বাহিনী (চি আৰ পি এফ)ৰ জোৱানৰ উপস্থিতিত পুখুৰীটোৰ পৰা বেলট বাকচ দুটা বিচাৰি উলিওৱা হয়।
জানিব পৰা মতে, ‘সন্ধানহীন’ বেলট বাকচ দুটা পশ্চিম বংগৰ জলপাইগুৰিৰ পাহাৰপুৰ ১৮/২২৫ ভোটগ্ৰহণ কেন্দ্ৰৰ পৰা দুষ্কৃতিকাৰীয়ে চুৰি কৰি নিছিল।
পশ্চিম বংগ পঞ্চায়ত নিৰ্বাচনৰ সময়ত দুষ্কৃতিকাৰীয়ে ভোটগ্ৰহণ কেন্দ্ৰটোত আক্ৰমণ কৰাৰ পিছতে সন্ধানহীন হৈ পৰিছিল বেলট বাকচ দুটা।
অসমৰ পৰা উদ্ধাৰ হোৱা বেলট বাকচৰ উপৰিও পশ্চিম বংগৰ মুৰ্ছিদাবাদ জিলাত দেওবাৰে (০৯ জুলাই) এটা নলাত তিনিটা পেলনীয়া বেলট বাকচ উদ্ধাৰ হয়।
পশ্চিম বংগত পঞ্চায়ত নিৰ্বাচনৰ ভোটগ্ৰহণত বৃহৎ মাত্ৰাত হিংসাত্মক ঘটনা ঘটিছে যাৰ ফলত কমেও ২০ জন লোকে প্ৰাণ হেৰুৱাইছে।
পশ্চিম বংগৰ পঞ্চায়ত নিৰ্বাচনৰ ভোটগ্ৰহণৰ সময়ত কেইবাখনো গাঁৱত বেলট বাকচ ধ্বংস কৰা, ভোটগ্ৰহণ কেন্দ্ৰত আক্ৰমণ, বিৰোধীক বোমাৰে আক্ৰমণৰ লক্ষ্য কৰি লোৱাৰ দৰে ঘটনা সংঘটিত হয়।
