আমেৰিকাৰ প্ৰাক্তন ৰাষ্ট্ৰপতি ড’নাল্ড ট্ৰাম্পে প্ৰাক্তন পৰ্ণ তাৰকা ষ্টৰ্মি ডেনিয়েলছক সম্পৰ্কৰ বিষয়ে মুখ বন্ধ কৰি ৰাখিবলৈ উৎকোচ দিয়াৰ অভিযোগ উত্থাপন হৈছে। কিন্তু সেই ষ্টৰ্মীয়ে কৈছে যে এই গোচৰত ড’নাল্ড ট্ৰাম্প জেললৈ যোৱাটো ঠিক নহ’ব।
বৰ্তমান ৪৪ বছৰীয়া ষ্টৰ্মীয়ে ফক্স নিউজক দিয়া এক সাক্ষাৎকাৰত কয় যে, “মই নাভাবো যে মোৰ বিৰুদ্ধে তেওঁৰ (ট্ৰাম্প) অপৰাধ কাৰাদণ্ডৰ যোগ্য।”
ষ্টৰ্মীয়ে লগতে কয়, ‘মই বৰঞ্চ তেওঁৰ (ট্ৰাম্প) আন কামবোৰৰ কথাহে চিন্তা কৰো। অৱশেষত যদি তেওঁক দোষী সাব্যস্ত কৰা হয় তেন্তে তেওঁ হয়তো জেললৈ যাবলগীয়া হ’ব।’
যোৱা সপ্তাহত নিউয়ৰ্কৰ গ্ৰেণ্ড জুৰীয়ে ষ্টৰ্মি ডেনিয়েলছৰ উৎকোচ গোচৰত ট্ৰাম্পক অপৰাধমূলক অভিযোগত অভিযুক্ত কৰিছিল। ট্ৰাম্প অপৰাধমূলক অপৰাধৰ অভিযোগত অভিযুক্ত হোৱা প্ৰথমজন আমেৰিকাৰ প্ৰাক্তন ৰাষ্ট্ৰপতি।
২০০৬ চনত ষ্টৰ্মি ডেনিয়েলছৰ সৈতে ট্ৰাম্পে যৌন সম্পৰ্ক ৰখাৰ অভিযোগ উত্থাপন হৈছিল। পিছত ২০১৬ চনৰ ৰাষ্ট্ৰপতি নিৰ্বাচনৰ পূৰ্বে এই বিষয়ে মুখ নুখুলিবলৈ ষ্টৰ্মিক ১ লাখ ৩০ হাজাৰ ডলাৰ উৎকোচ দিয়া হৈছিল।
এই লেনদেন সেই বছৰ ৰাষ্ট্ৰপতি নিৰ্বাচনৰ ঠিক আগতে হৈছিল। নিৰ্বাচনত ৰিপাব্লিকান পাৰ্টিৰ মনোনয়ন লাভ কৰে ট্ৰাম্পে। অৱশ্যে এই লেনদেন ট্ৰাম্পে নিজৰ শপতনামাত লুকুৱাই ৰাখিছে।
এই গোচৰত যোৱা মঙলবাৰে মানহাটানৰ ফৌজদাৰী আদালতত আত্মসমৰ্পণ কৰিছিল ট্ৰাম্পে। গ্ৰেপ্তাৰ কৰি আদালতলৈ নিয়াৰ সময়ত ন্যায়াধীশগৰাকীয়ে ট্ৰাম্পৰ বিৰুদ্ধে উত্থাপিত ৩৪টা অভিযোগ পঢ়ি শুনায়। ট্ৰাম্পে এই অভিযোগ অস্বীকাৰ কৰে।
শুনানিৰ সময়ত কোৱা হৈছে যে ট্ৰাম্পৰ আইনী দলটোৱে গোচৰটোক প্ৰত্যাহ্বান জনোৱা যিকোনো আবেদন দাখিল কৰিবলৈ ৮ আগষ্টলৈকে সময় পাব। ইয়াৰ পৰৱৰ্তী শুনানি হ’ব ৪ ডিচেম্বৰত।
ইপিনে, অহা বছৰৰ ৰাষ্ট্ৰপতি নিৰ্বাচনত প্ৰতিদ্বন্দ্বিতা বুলি ঘোষণা কৰিছে ট্ৰাম্পে। ইয়াৰ পূৰ্বে প্ৰাক্তন পৰ্ণ ষ্টাৰ ষ্টৰ্মীক উৎকোচ দিয়াৰ এই গোচৰে তেওঁক বিপদত পেলাইছে।
ষ্টৰ্মি ডেনিয়েলছে ৰাজনীতিবিদ নোহোৱাকৈয়ে আমেৰিকাৰ ৰাজনীতিত ধুমুহাৰ সৃষ্টি কৰিছে। এই নামেৰে জনাজাত যদিও তেওঁৰ প্ৰকৃত নাম ষ্টেফানী ক্লিফৰ্ড। আগতে তেওঁ পৰ্ণ চিনেমাত অভিনয় কৰিছিল।
ষ্টৰ্মীয়ে কয় যে তেওঁ প্ৰথমবাৰৰ বাবে ২০০৬ চনৰ গ্রীষ্মকালত লেক টাহোত ৰিয়েল ইষ্টেট সাম্ৰাজ্যৰ পৰা ৰাজনীতিবিদলৈ পৰিণত হোৱা ট্ৰাম্পক লগ পাইছিল। কেলিফৰ্ণিয়া আৰু নেভাদাৰ সীমান্তৰ লেক টাহোত অনুষ্ঠিত হৈছিল এখন চেৰিটি গলফ্ প্ৰতিযোগিতা।
এই যৌন সম্পৰ্কৰ সময়ত ডেনিয়েলছৰ বয়স আছিল ২৭ আৰু ট্ৰাম্পৰ বয়স আছিল ৬০ বছৰ। ষ্টৰ্মিৰ মতে, ট্ৰাম্পে তেওঁক নিজৰ হোটেলৰ কোঠাত নিশাৰ আহাৰ গ্ৰহণ কৰিবলৈ নিমন্ত্ৰণ জনাইছিল। তাত নৈশ পোছাকত তেওঁক আদৰি নিছিল। তাতে দুয়োৱে শাৰীৰিক সম্পৰ্কত লিপ্ত হৈছিল।
