কেন্দ্ৰীয় মাধ্যমিক শিক্ষা ব’ৰ্ডে সিদ্ধান্ত লৈছে যে ব’ৰ্ডৰ স্থগিত পৰীক্ষাসমূহত নিজ জিলাৰ পৰাই পৰীক্ষাৰ্থীসকলে অৱতীৰ্ণ হ’ব পাৰিব।
কেন্দ্ৰীয় মামৱ সম্পদ উন্নয়ন মন্ত্ৰী ৰমেশ পখ্ৰীয়াল নিশাঙ্কে এই কথা যোৱা বুধবাৰে সন্ধিয়া ঘোষণা কৰে।
উল্লেখ্য যে কোভিড১৯ সংক্ৰমণ ৰোধৰ বাবে দেশজুৰি জাৰি কৰা ল’কডাউনৰ ফলত ব’ৰ্ডর কেবাটাও পৰীক্ষা স্থগিত ৰখা হৈছিল।
ইতিমধ্য পৰীক্ষাৰ্সথীসকলেও অধ্যয়নৰত চহৰ এৰি নিজ গৃহত আৱদ্ধ হৈ আছে।
সেয়ে চিবিএছচিএ অৱশিষ্ট ব’ৰ্ড পৰীক্ষাসমূহত গৃহ জিলাৰ পৰাই পৰীক্ষাৰ্থীসকলে পৰীক্ষাত অৱতীৰ্ণ হ’ব পৰা ব্যৱস্থা গ্ৰহণ কৰা বুলি কেন্দ্ৰী মন্ত্ৰী গৰাকীয়ে জনাইছে।
দেশত কোভিড১৯ত আক্ৰান্তৰ সংখ্যা অপ্ৰতিৰোধ্য গতিত বৃদ্ধি পোৱাৰ বাবে ব’ৰ্ডৰ স্থগিত পৰীক্ষাসমূহ এতিয়াও অনুষ্ঠিত কৰিব পৰা হোৱা নাই।
তেওঁ আৰু জনায় যে শিক্ষাৰ্থীসকলে নিজ বিদ্যালয়ক তেওঁলোকৰ বৰ্তমান অৱস্থান সম্পৰ্কে অৱগত কৰিব।
আৰু সেই তথ্য ব’ৰ্ডে সংগ্ৰহ কৰি অৱশিষ্ট পৰীক্ষাৰ স্থান সম্পৰ্কে পৰীক্ষাৰ্থীক অৱগত কৰিব।
ইতিমধ্যে ব’ৰ্ডে দশম আৰু দ্বাদশ শ্ৰেণীৰ স্থগিত পৰীক্ষাৰ তাৰিখ ঘোষণা কৰিছিল।
আনহাতে সংশোধীত সূচী অনুসৰি দশম আৰু দ্বাদশ শ্ৰেণীৰ স্থগিত ব’ৰ্ড পৰীক্ষাসমূহ ১ জুলাইৰ পৰা ১৫ জুলাইৰ ভিতৰত অনুষ্ঠিত হোৱাৰ কথা।
কেন্দ্ৰীয় মন্ত্ৰী পখ্ৰীয়ালে জনাই যে কেন্দ্ৰীয় মাধ্যমিক শিক্ষা সংসদে আগন্তুক স্থগিত পৰীক্ষাৰ বাবে দেশজুৰি ১৫ হাজাৰ পৰীক্ষা কেন্দ্ৰৰ ব্যৱস্থা কৰিব যাতে পৰীক্ষাৰ্থীসকলৰ সামাজিক ব্যৱধান নিশ্চিত কৰিব পাৰি।
