‘’আমাৰ ছাত্ৰ-ছাত্ৰীসকলক এক অমংগলীয়া ভয়ে গ্ৰাস কৰি থাকে। সেয়া হৈছে পৰীক্ষাৰ সাজু হোৱাৰ সময়ত এডমিট কাৰ্ডত ভুল আহে নেকি, পৰীক্ষাৰ প্ৰশ্ন সমূহ চিলেবাচৰ ভিতৰত পৰে নে নপৰে, পৰীক্ষাৰ ফলাফলৰ সময়ত বহীবোৰ জ্বলি যায় নেকি অথবা গৰুৱে খাই নেকি আদি। আমাৰ শিক্ষাপদ্ধতিৰ এনেবোৰ আঁসোৱাহ দূৰ কৰিবৰ বাবে মাধ্যমিক শিক্ষা পৰিষদ, উচ্চতৰ মাধ্যমিক শিক্ষা সংসদৰ সংস্কাৰ সাধন কৰিব লাগিব। এই সংস্কাৰ হ’ব লাগিব ছাত্ৰ-ছাত্ৰীৰ মংগল হোৱাকৈ’’- এই মন্তব্য সদৌ অসম ছাত্ৰ সন্থাৰ মুখ্য উপদেষ্টা ডঃ সমুজ্জল কুমাৰ ভট্টাচাৰ্যৰ।
শুকুৰবাৰে নগাঁৱৰ অগ্ৰণী শিক্ষানুষ্ঠান ৰামানুজন কনিষ্ঠ মহাবিদ্যালয়ৰ নৱাগত আদৰণী অনুষ্ঠানৰ সভাত নিৰ্দিষ্ট বক্তা হিচাপে অংশ গ্ৰহণ কৰি ডঃ ভট্টাচাৰ্যই কয় যে যি সময়ত বিহাৰত নালন্দা বিশ্ববিদ্যালয়ৰ পুনৰুজ্জীৱিতকৰণৰ বাবে পৰিকল্পনা গ্ৰহণ কৰিছে, বিশ্বৰ বৰেণ্য ব্যক্তিসকলক লৈ ইয়াৰ বাবে আলোচনাত মিলিত হৈছে তেনে সময়ত অসমত ছেবাৰ পৰীক্ষা ভালদৰে অনুষ্ঠিত হ’ব নে নহয় আমি চিন্তা কৰিবলগীয়া হৈছে।
ছাত্ৰ-ছাত্ৰীসকলক আহ্বান জনাই সদৌ অসম ছাত্ৰ-সন্থাৰ মুখ্য উপদেষ্টাজনে কয় যে ছাত্ৰ-ছাত্ৰীসকলে শিক্ষা, কেৰিয়াৰৰ লগতে অসমৰ কথাও চিন্তা কৰিব লাগিব। তেওঁলোকে অৰ্থনৈতিক সংগ্ৰাম কৰিব লাগিব। পৰিকল্পিত সাংস্কৃতিক পদক্ষেপ গ্ৰহণ কৰিব লাগিব। তেওঁলোকে এটা মন্ত্ৰ গ্ৰহণ কৰিব লাগিব। সেয়া হৈছে আমাৰ কাম অসমৰ কাম, আমাৰ সন্মান অসমৰ সন্মান।
ডঃ ভট্টাচাৰ্যই ছাত্ৰ-ছাত্ৰীসকলক মাটি,মন আৰু মগজুৰ চিন্তাৰে আগুৱাই যোৱাৰ আহ্বান জনাই কয় যে ছাত্ৰ-ছাত্ৰীসকল অধ্যয়নপুষ্ট হোৱাৰ লগতে পৰিপক্ক আৰু দূৰদৰ্শী হ’ব লাগিব। বলিষ্ঠ ব্যক্তিত্বৰ অধিকাৰী হ’ব লাগিব। ৰামানুজন কনিষ্ঠ মহাবিদ্যালয়ক প্ৰশংসা কৰাৰ লগতে ডঃ ভট্টাচাৰ্যই কনিষ্ঠ মহাবিদ্যালয়খনে প্ৰয়োগ কৰা শিক্ষণ পদ্ধতি ৰজাঘৰে চৰকাৰী শিক্ষানুষ্ঠানত কিয় প্ৰয়োগ কৰিব নোৱাৰে বুলিও প্ৰশ্ন কৰে।
তেঁও কয় অসমৰ মেধাবী ছাত্ৰ-ছাত্ৰীয়ে বহি:ৰাজ্যত অধ্যয়ন কৰাৰ নামত বছৰি ৩০০ কোটি টকা খৰচ হয়। সেই ধনৰে আমি অসমত বহুতো উন্নত মানৰ চৰকাৰী শিক্ষানুষ্ঠান স্থাপন কৰিব কিয় নোৱাৰো। ডঃ ভট্টাচাৰ্যই অসমৰ প্ৰথমখন দক্ষতাৰ বিশ্ববিদ্যালয় স্থাপন কৰিবৰ বাবে চৰকাৰক আহ্বান জনোৱাৰ লগতে অসমত ভাৰতীয় বিজ্ঞান গৱেষণাৰ প্ৰতিষ্ঠান, ব্ৰহ্মপুত্ৰৰ গৱেষণা প্ৰতিষ্ঠান, ঔষধি গছৰ গৱেষণাৰ প্ৰতিষ্ঠান স্থাপনৰ বাবে আহ্বান জনায়।
সভাত অংশগ্ৰহণ কৰি অৰণ্য মানৱ যাদৱ পায়েঙে কয় যে আধুনিক বিশ্বত নগৰীয়াকৰণ আৰু উদ্যোগীকৰণে প্ৰকৃতিৰ প্ৰতি ভাবুকি কঢ়িয়াই আনিছে যাৰ ফলত আৰু কিমান দিন পৃথিৱীখন থাকিব তাক লৈ সন্দেহ আছে। ৰাজনীতি , ধৰ্মনীতি, অৰ্থনীতি সকলো প্ৰকৃতিৰ ওপৰতে নিৰ্ভৰশীল। গছ অবিহনে পৃথিৱীক কোনেও ৰক্ষা কৰিব নোৱাৰে, এই কথা প্ৰকৃতিয়ে সোঁৱৰাই আহিছে যদিও বিশ্ববাসীয়ে তাক আওকাণ কৰি বন ধ্বংস কৰাৰ ফলত জলবায়ুৰ দ্ৰুত পৰিবৰ্তন হ’ব ধৰিছে আৰু মানৱ সভ্যতালৈ দুৰ্যোগ কঢ়িয়াই আনিছে।
এই সন্দৰ্ভত তেওঁ আক্ষেপ কৰি কয় যে চৰাই-চিৰিকটি, হাতী-হৰিণা, নদ নদী আদিয়েও প্ৰত্যক্ষ বা পৰোক্ষভাবে হাবি-জংঘল বিস্তাৰত সহযোগিতা আগবঢ়াই অহাৰ বিপৰীতে জীৱ শ্ৰেষ্ঠ বুলি কোৱা মানুহে বন ধ্বংস কৰিছে। ভাষণ প্ৰসংগত তেওঁ কয় যে হাতী-মানুহৰ সংঘাত দূৰ কৰাৰ বাবে গছ ৰোপণৰ ওপৰত গুৰুত্ব দিয়ে। ব্ৰহ্মপুত্ৰৰ দুয়োপাৰে নাৰিকল গছ ৰোপণ কৰি গৰাখহনীয়া ৰোধৰ বাবে আহ্বান জনায়।
প্ৰত্যেক ছাত্ৰ ছাত্ৰীকে নিজৰ জন্মদিনত এজোপাকৈ গছ ৰোপনৰ আহবান জনাই তেওঁ কয় যে যিজনে প্ৰকৃতি ভাল পায় তেওঁ পৃথিৱীক ভাল পায় আৰু যি পৃথিৱীক ভাল পায় তেওঁ সমগ্ৰ জীৱ জগতক ভাল পায়। দৌৰৰ ৰাণী হিমা দাসে দুশ মিটাৰ দৌৰত ভুল কৰাক লৈ এচামে হৈ-চৈ কৰাত তেওঁ আক্ষেপ প্ৰকাশ কৰি কয়, হিমাক লৈ অযথা হৈ চৈ কৰাৰ কাৰো অধিকাৰ নাই। খেলুৱৈগৰাকীক উৎসাহিত কৰাটোহে আমাৰ কৰ্তব্য। পায়েঙৰ আহৱান – ‘’হিমাক ঘৰলৈ অহাৰ পিছত তেওঁক গামোচা পিন্ধাই সময় নষ্ট নকৰি অলিম্পিকৰ বাবে কঠোৰ শ্ৰম কৰিবলৈ সাজু হ’বলৈ সুবিধা দিয়ক।
সভাত বিধায়ক ৰূপক শৰ্মাই ৰামানুজন কনিষ্ঠ মহাবিদ্যালয়খনৰ গীতৰ এখন চি ডি উন্মোচন কৰি কয় যে এই মহাবিদ্যালয়খনৰৰ চমকপ্ৰদ ফলাফলে নগাঁৱত এক শৈক্ষিক পৰিৱেশ সৃষ্টি কৰিছে। তেওঁ সততা আৰু নিষ্ঠাৰে ছাত্ৰ-ছাত্ৰীসকলক অধ্যয়নত ব্ৰতী হ’বলৈ আহবান জনায় ।
ৰামানুজন কনিষ্ঠ মহাবিদ্যালয়ৰ অধ্যক্ষ দিলীপ বৰাৰ সভাপতিত্বত অনুষ্ঠিত সভাত সদৌ অসম ছাত্ৰ সন্থাৰ সভাপতি মণিমাধৱ মহন্তই ভাষণ দিয়ে। সভাত আনন্দৰাম ঢেকিয়াল ফুকন মহাবিদ্যালয়ৰ অৱসৰপ্ৰাপ্ত অধ্যাপক বিপুল বৰা, ধেমাজি কলেজৰ অধ্যাপক উপেন কোঁচকে ধৰি ভালে কেইগৰাকী বিশিষ্ট ব্যক্তি উপস্থিত থাকে।
উক্ত সভাতে কনিষ্ঠ মহাবিদ্যালয়খনৰ ছাত্ৰ-ছাত্ৰী আৰু শিক্ষক-শিক্ষয়ত্ৰীসকলে ‘কৰুণাধাৰাৰ’ পুঁজিলৈ ২০ হাজাৰ টকা আগবঢ়ায়। সভাতে মহাবিদ্যালয়খনৰ বিভিন্ন বিভাগৰ শিক্ষক-শিক্ষয়ত্ৰীসকলক সমৰ্ধনা জনোৱাৰ লগতে কৃতী ছাত্ৰ-ছাত্ৰীসকলক বঁটা প্ৰদান কৰে।
