ক’ৰ’না মহামাৰীৰ বিৰুদ্ধে যুদ্ধৰ বাবে ভাৰতীয় ক্ৰিকেট দলৰ পূৰ্বৰ অধিনায়ক সুনীল মনোহৰ গাভাস্কাৰে চৰকাৰলৈ ৫৯ লাখ টকাৰ অনুদান আগবঢ়াইছে।
৭০ বছৰীয়া তাৰকা ক্ৰিকেটাৰ গৰাকীয়ে প্ৰধান মন্ত্ৰী সাহায্য পুঁজিলৈ ৩৫ লাখ টকা আৰু মহাৰাষ্ট্ৰ চৰকাৰলৈ ২৪ টকাৰ সাহায্য আগবঢ়াই।
উল্লেখযোগ্য যে, অনুদান আগবঢ়োৱাৰ পাছত গাভাস্কাৰে এই সন্দৰ্ভত প্ৰকাশ কৰা নাছিল যদিও মুম্বাইৰ আন এগৰাকী প্ৰাক্তন ক্ৰিকেটাৰ আমোল মজুমদাৰে গাভাস্কাৰৰ অনুদান সম্পৰ্কে টুইটাৰত উল্লেখ কৰি তেওঁক শুভেচ্ছা জ্ঞাপন কৰাৰ পাছতহে এই কথা পোহৰলৈ আহে।
পূৰ্ব ক্ৰিকেটাৰ সুনীল গাভাস্কাৰৰ লগতে ভাৰতীয় দলৰ বৰ্তমানৰ আন এগৰাকী ক্ৰিকেটাৰ চেতেশ্বৰ পূজাৰায়ো প্ৰধান মন্ত্ৰীৰ সাহায্য পুজি আৰু গুজৰাট চৰকাৰলৈ সাহায্য আগবঢ়ায়।
উল্লেখযোগ্য যে, ইয়াৰ পূৰ্বে শচীন টেণ্ডুলকাৰ, ৰোহিত শৰ্মা, বিৰাট কোহলী, যুৱৰাজ সিং, সুৰেশ ৰাইনাকে ধৰি ভালেকেইগৰাকী ভাৰতীয় দলৰ বৰ্তমানৰ আৰু পূৰ্বৰ ক্ৰিকেটাৰে ক’ৰ’নাৰ বিৰুদ্ধে সংঘবদ্ধ হৈ যুঁজাৰ বাবে চৰকাৰলৈ সাহায্য আগবঢ়াইছে।
