ইছলামিক মৌলবাদীৰ তীব্ৰ বিৰোধিতাৰ বাবে বিশ্ববিখ্যাত কবি, গীতিকাৰ, চিত্ৰনাট্যকাৰ জাভেদ আখতাৰক মুখ্য অতিথি হিচাপে নিমন্ত্ৰণ কৰা ‘মুছাইৰা’ অনুষ্ঠান বাতিল কৰিছে পশ্চিমবংগ উৰ্দু একাডেমীয়ে। কেইবাটাও কঠোৰ মুছলমান সংগঠনে এই উৰ্দু সাহিত্য উৎসৱৰ বাবে ‘আল্লাহ বিৰোধী নাস্তিক’ জাভেদ আখতাৰক কলকাতাত প্ৰৱেশ কৰিবলৈ নিদিয়াৰ হুংকাৰ দিছিল। সংগঠনসমূহে সকীয়াই দিছিল যে আখতাৰক আনিলে তাছলিমা নাছৰিনৰ দৰে হিংসাত্মক প্ৰতিবাদৰ সন্মুখীন হ’ব লাগিব।
পশ্চিমবংগ উৰ্দু একাডেমীয়ে আয়োজন কৰিছিল ‘হিন্দী চিনেমাত উৰ্দু’ শীৰ্ষক সাহিত্য মহোৎসৱ আৰু আলোচনা কাৰ্যসূচী। ৩১ আগষ্টৰ পৰা ৩ ছেপ্টেম্বৰলৈ চলিব লগা আছিল মুছাইৰা আৰু আলোচনা কাৰ্যসূচী। কলকাতাত চাৰিদিনীয়া এই অনুষ্ঠানত ভাৰতীয় চিনেমাত উৰ্দুৰ ভূমিকা, কবিতা পাঠ আৰু সাংস্কৃতিক মনোৰঞ্জন আদি বিষয়ক আলোচনা কৰা হয়। ১ ছেপ্টেম্বৰৰ মুছাইৰাত মুখ্য অতিথি হিচাপে জাভেদ আখতাৰৰ দৰে এজন প্ৰখ্যাত কবিক আমন্ত্ৰণ জনোৱা হৈছিল।
ইয়াৰ লগে লগে দুটা উগ্ৰ সংগঠন ক্ৰমে জমিয়ত উলেমা-ই-হিন্দৰ কলকাতা শাখা আৰু ৱাহায়িন ফাউণ্ডেচন বিৰোধিতা কৰি ওলাই আহিল। জাভেদ আখতাৰে মুছলমান ধৰ্ম আৰু আল্লাহৰ বিৰুদ্ধে কথা কোৱা বুলি অভিযোগ উত্থাপন কৰে। তেওঁ আল্লাহৰ ওপৰত আস্থা আৰু বিশ্বাস কৰা নাছিল, আৰু তেনে ব্যক্তিক কলকাতালৈ আহিবলৈ দিয়া উচিত নহয়।
উৰ্দু একাডেমীয়ে জাভেদ আখতাৰৰ নিমন্ত্ৰণ প্ৰত্যাহাৰ নকৰিলে গণতান্ত্ৰিক প্ৰতিবাদ হ’ব বুলি হুংকাৰ দিয়ে জমিয়তে। ঠিক যেনেকৈ ২০০৭ চনত তাছলিমা নাছৰিনৰ বিৰুদ্ধে হৈছিল।ইয়াৰ প্ৰতি লক্ষ্য ৰাখি একাডেমীয়ে জনাইছিল যে অনিবাৰ্য কাৰণত অনুষ্ঠানটো পিছুৱাই দিয়া হৈছে। এক সূত্ৰই ‘দ্য হিন্দু’ক জনোৱা মতে, নিৰ্বাচনৰ পূৰ্বে মমতা বেনাৰ্জীৰ নেতৃত্বত ৰাজ্য চৰকাৰে কোনো ধৰণৰ উত্তেজনা বৃদ্ধি কৰিবলৈ অনিচ্ছুক। সেয়ে সংঘাতত সোমোৱাতকৈ পিছুৱাই দিয়াৰ সিদ্ধান্ত লৈছে।
জাভেদ আখতাৰ এজন স্বঘোষিত নাস্তিক আৰু ধৰ্মনিৰপেক্ষ মানৱতাবাদী। তেওঁ নিজকে এজন সংস্কৃতিবান মুছলমান বুলি পৰিচয় দিবলৈ পছন্দ কৰে। এই সন্দৰ্ভত পশ্চিমবংগ উৰ্দু একাডেমীৰ সম্পাদক নুজৰত জৈনাবে কয় যে অনিবাৰ্য কাৰণত চাৰিদিনীয়া এই অনুষ্ঠান বাতিল কৰা হৈছে। সংবাদ মাধ্যমৰ হেঁচাত তেওঁ একেই কথা কৈ থাকে। মানৱ অধিকাৰ কৰ্মী শ্ববনম হাছমীয়ে কয় যে ভাৰত কোনো হিন্দুৰ দেশ নহয় বা মুছলমানৰ দেশ নহয়। যিসকল নাস্তিক বা ঈশ্বৰ বা আল্লাহক বিশ্বাস নকৰে, তেওঁলোকৰো এই দেশত জীৱন আৰু বাক স্বাধীনতা আছে। লগতে কয় যে বহু ধৰ্মীয় দেশতো কোনো ধৰ্মত বিশ্বাস নকৰা বহু লোক আছে। গতানুগতিক মুছলমানসকলৰ ভয়ত এই অনুষ্ঠান বাতিল কৰা ঘটনাক গৰিহণা দিয়ে কবি আৰু সাহিত্যিক গৌহৰ ৰাজাই।
