‘কোন প্ৰকৃত ভাৰতীয় সেই সিদ্ধান্ত উচ্চতম ন্যায়ালয়ে ল’ব নোৱাৰে ।’ ৰাহুল গান্ধীক উচ্চতম ন্যায়ালয়ে কৰা তিৰস্কাৰ সন্দৰ্ভত এই মন্তব্য কংগ্ৰেছৰ সাধাৰণ সম্পাদক প্ৰিয়ংকা গান্ধী ভাদ্ৰাৰ।
উল্লেখ্য যে সোমবাৰে উচ্চতম ন্যায়ালয়ে ৰাহুল গান্ধীক কৈছিল, ‘‘আপুনি যদি প্ৰকৃত ভাৰতীয়, তেন্তে এনে কথা কোৱা উচিত নহয়।’’
সোমবাৰে উচ্চতম ন্যায়ালয়ে ৰাহুল গান্ধীক কৈছিল যে ভাৰতৰ এক বৃহৎ অংশ চীনা সেনাই যে দখল কৰিছে সেই কথা আপুনি কেনেকৈ গম পালে? মত প্ৰকাশৰ স্বাধীনতাৰ অৰ্থ এইটো নহয় যে আপুনি যি বিচাৰে ক’ব পাৰে।
উল্লেখ্য যে ২০২০ চনত অৰুণাচল প্ৰদেশৰ গালৱান উপত্যকাত ভাৰত-চীন সামৰিক সংঘৰ্ষ সন্দৰ্ভত লোকসভাৰ ৰাহুল গান্ধীয়ে কৰা এক মন্তব্যক লৈ লক্ষ্ণৌ আদালতত অপৰাধমূলক অৱমাননাৰ গোচৰ ৰুজু হৈছিল। সেই গোচৰৰ স্থগিতাদেশ বিচাৰি উচ্চতম ন্যায়ালয়ৰ কাষ চাপিছিল ৰাহুল গান্ধী।
ৰাহুল গান্ধীয়ে ২০২২ চনৰ ১৬ ডিচেম্বৰত ভাৰত জোড়ো যাত্ৰাৰ সময়ত এক বিবৃতিত কৈছিল যে ভাৰতীয় জোৱানক চীনা সৈন্যই নৃশংসভাৱে প্ৰহাৰ কৰিছিল। এই অভিযোগৰ ওপৰত এটা গোচৰ ৰুজু কৰিছিল সীমান্ত পথ সংস্থাৰ প্ৰাক্তন সঞ্চালক উদয় শংকৰ শ্ৰীবাস্তৱে।
এই গোচৰত ভাতৃৰ পক্ষ লৈ উচ্চতম ন্যায়ালয়ে দিয়া ধমক সন্দৰ্ভত আজি প্ৰিয়ংকাই কয় যে উচ্চতম ন্যায়ালয়ে তেওঁৰ ভাষণৰ উদ্দেশ্যৰ ভুল ব্যাখ্যা কৰিছে। কেৰালাৰ ৱায়ানাদৰ সংসদ সদস্য প্ৰিয়ংকাই উচ্চতম ন্যায়ালয়ৰ সন্মানীয় ন্যায়াধীশসকলৰ প্ৰতি যথাযথ শ্ৰদ্ধা জনাই কয় যে প্ৰকৃত ভাৰতীয় কোন সেইটো তেওঁলোকে সিদ্ধান্ত ল’ব নোৱাৰে। বিৰোধী দলপতিৰ কৰ্তব্য চৰকাৰক প্ৰশ্ন কৰা। চৰকাৰক প্ৰশ্ন কৰিবই। মোৰ ভাতৃয়ে কেতিয়াও সেনাৰ বিৰুদ্ধে একো কোৱা নাছিল। সেনাবাহিনীৰ প্ৰতি তেওঁৰ বহুত শ্ৰদ্ধা আছে, কিন্তু তেওঁ কথাৰ ভুল ব্যাখ্যা কৰা হ’ল।
