সঞ্জয় কুমাৰ মিশ্ৰৰ ইডিৰ সঞ্চালক হিচাপে তৃতীয়বাৰৰ বাবে কাৰ্যকাল বৃদ্ধি কৰিবলৈ কেন্দ্ৰীয় চৰকাৰে দিয়া নিৰ্দেশক মঙলবাৰে অবৈধ বুলি আখ্যা প্ৰদান কৰে উচ্চতম ন্যায়ালয়ে । এই গোচৰত উচ্চতম ন্যায়ালয়ে পৰ্যবেক্ষণ কৰিছে যে ২০২১ চনৰ উচ্চতম ন্যায়ালয়ৰ নিৰ্দেশ অমান্য কৰিছে কেন্দ্ৰীয় চৰকাৰে।
উচ্চতম ন্যায়ালয়ে মিশ্ৰক কাৰ্যভাৰ ত্যাগ কৰিবলৈও ৩১ জুলাইলৈকে সময় দিয়ে।
ভাৰতীয় ৰাজহ সেৱাৰ বিষয়া সঞ্জয় কুমাৰ মিশ্ৰক প্ৰথমবাৰৰ বাবে ২০১৮ চনত বলবৎকাৰী সঞ্চালকালয়(ইডি)ৰ সঞ্চালক হিচাপে নিযুক্তি দিয়া হৈছিল। সেইবাৰ কেন্দ্ৰই তেওঁক দুবছৰৰ বাবে সেই দায়িত্ব দিছিল। ইয়াৰ পিছত ২০২০ চনত চেণ্ট্ৰেল ভিজিলেন্স কমিচন এক্ট অৰ্থাৎ CVC Actৰ অধীনত আৰু এবছৰৰ বাবে তেওঁৰ কাৰ্যকাল বৃদ্ধি কৰা হয়। এই নিৰ্দেশনা কাৰ্যকৰী কৰিবলৈ ২০১৮ চনৰ পুৰণি নিযুক্তি গাইডলাইন তিনিবছৰলৈ সংশোধন কৰা হয়।
নৰেন্দ্ৰ মোডী চৰকাৰে সঞ্জয় মিশ্ৰৰ ইডি সঞ্চালকৰ কাৰ্যকাল একেৰাহে তিনিটা কাৰ্যকাল বৃদ্ধি কৰাৰ সিদ্ধান্তৰ বিৰুদ্ধে উচ্চতম ন্যায়ালয়ত কেইবাখনো আবেদন দাখিল কৰা হয়।
আবেদনকাৰীৰ ভিতৰত আছিল কংগ্ৰেছ নেতা জয়া ঠাকুৰ, ৰনদীপ সিং সুৰজেৱালা, তৃণমূল কংগ্ৰেছৰ সাংসদ মহুৱা মৈত্ৰী, আৰু দলৰ মুখপাত্ৰ সাকেত গোখলে।
উচ্চতম ন্যায়ালয়ৰ শুনানিৰ সময়ত কেন্দ্ৰীয় চৰকাৰৰ যুক্তি আছিল যে আৰ্থিক দুৰ্নীতিৰ বহু গুৰুত্বপূৰ্ণ গোচৰৰ তদন্তৰ লগত ইডি জড়িত। ফলত সেই সকলোবোৰ তদন্তৰ স্বাৰ্থত সঞ্জয়ৰ পৰিচালক হিচাপে কাৰ্যকাল বৃদ্ধি কৰা হৈছে।
প্ৰত্যাহ্বান জনোৱা সংশোধনীৰ অধীনত মিশ্ৰৰ কাৰ্যকাল ২০২১ চনৰ নৱেম্বৰৰ পৰা ২০২২ চনৰ নৱেম্বৰলৈ বৃদ্ধি পাইছিল। পুনৰ কেন্দ্ৰই অধিসূচনাৰ জৰিয়তে ২০২২ চনৰ নৱেম্বৰ মাহত ২০২৩ চনৰ নৱেম্বৰলৈকে তেওঁৰ কাৰ্যকাল বৃদ্ধি কৰিছিল।
কিন্তু ২০২১ চনৰ ছেপ্টেম্বৰ মাহত গোচৰসমূহৰ শুনানি গ্ৰহণ কৰি উচ্চতম ন্যায়ালয়ে কয় যে তদন্তৰ স্বাৰ্থত অৱসৰৰ পিছতো সঞ্জয়ৰ কাৰ্যকাল এবাৰ বৃদ্ধি হ’ব পাৰে। কিন্তু তাৰ পিছত সময়সীমা বৃদ্ধি কৰিব নোৱাৰে।
