উচ্চতম ন্যায়ালয়ে সকীয়নি প্ৰদান কৰিছে পতঞ্জলীৰ স্বতাধিকাৰ বাবা ৰামদেৱক। আয়ুৰ্বেদৰ গৱেষণাৰ ভিত্তিত সামগ্ৰী প্ৰস্তুতৰ নামত বিজ্ঞাপনত বিভিন্ন ৰোগ নিৰাময়ৰ মিছা আৰু বিভ্ৰান্তিকৰ দাবীৰ বিৰুদ্ধে পতঞ্জলিক সকীয়াই দিছে সৰ্বোচ্চ ন্যায়ালয়ে। যদিহে এনে ভুৱা বিজ্ঞাপন তৎক্ষণাত বন্ধ নহয়, তেন্তে পতঞ্জলিৰ প্ৰতিটো সামগ্ৰীৰ ওপৰত এক কোটি টকাৰ জৰিমনা আৰোপ কৰা হ’ব বুলিও উচ্চতম ন্যায়ালয়ে কয়।
মঙলবাৰে ভাৰতীয় চিকিৎসা সংস্থাই পতঞ্জলিৰ বিৰুদ্ধে দাখিল কৰা গোচৰৰ শুনানি গ্ৰহণ কৰে উচ্চতম ন্যায়ালয়ে। ন্যায়াধীশ আহছানুদ্দিন অমানুল্লাহ আৰু ন্যায়াধীশ প্ৰশান্ত কুমাৰ মিশ্ৰৰ বিচাৰপীঠে পতঞ্জলি কোম্পানীটোক কঠোৰ ধমক জাৰি কৰি কয় যে, ‘পতঞ্জলিয়ে আয়ুৰ্বেদৰ সকলো মিছা আৰু বিভ্ৰান্তিকৰ বিজ্ঞাপন শীঘ্ৰে বন্ধ কৰিব লাগে। এই আদেশ অমান্য হ’লে আদালতে কঠোৰ ব্যৱস্থা গ্ৰহণ কৰিব।”
প্ৰসংগক্ৰমে ২০২২ চনৰ ২৩ আগষ্টত উচ্চতম ন্যায়ালয়ে কেন্দ্ৰীয় স্বাস্থ্য মন্ত্ৰালয়, আয়ুচ মন্ত্ৰালয় আৰু পতঞ্জলি আয়ুৰ্বেদ লিমিটেডলৈ জাননী প্ৰেৰণ কৰে। ভাৰতীয় চিকিৎসা সংস্থাই অভিযোগ কৰে যে ৰামদেৱ আৰু তেওঁৰ সংগঠনে টিকাকৰণ আৰু আধুনিক চিকিৎসা বিজ্ঞানৰ বিৰুদ্ধে অভিযান চলাইছিল।
কালি শুনানিৰ সময়ত উচ্চতম ন্যায়ালয়ে পতঞ্জলিক আয়ুৰ্বেদক আধুনিক চিকিৎসা বিজ্ঞানৰ বিৰুদ্ধে কোনো ধৰণৰ বিভ্ৰান্তিকৰ দাবী বা বিজ্ঞাপন দিয়াৰ পৰা বাধা প্ৰদান কৰে। লগতে সকীয়াই দিয়া হৈছে যে যদি পতঞ্জলিয়ে ৰোগ নিৰাময়ৰ ক্ষেত্ৰত কোনো ধৰণৰ ভুৱা দাবী বা অভিযান চলায় তেন্তে প্ৰতিটো সামগ্ৰীৰ ওপৰত ১ কোটি টকা জৰিমনা ভৰিব লাগিব।
একে সময়তে কেন্দ্রক উচ্চতম ন্যায়ালয়ে নিৰাময়ৰ এনে বিভ্ৰান্তিকৰ বিজ্ঞাপনৰ সমস্যাৰ সমাধান বিচাৰি উলিয়াবলৈও কয়। পতঞ্জলিৰ বিৰুদ্ধে ভাৰতীয় চিকিৎসা সংস্থাৰ গোচৰৰ শুনানি অহা ৫ ফেব্ৰুৱাৰী, ২০২৪ত হ’ব।
