চৰকাৰৰ চৰম প্ৰতাৰণাৰ বলি হৈ পুনৰ শিৱসাগৰৰ আন এগৰাকী বেতন বঞ্চিত শিক্ষকে মৃত্যুক আঁকোৱালি ল’ব লগা হয়।
সুদীৰ্ঘ ৬ বছৰ বেতনৰ পৰা বঞ্চিত শিক্ষয়িত্ৰী গৰাকী দীৰ্ঘদিন ধৰি ৰোগাক্ৰান্ত হৈ আছিল আৰু দেওবাৰে বিয়লি ৪ বজাত মৃত্যু হয় শিক্ষয়িত্ৰী গৰাকীৰ। মৃত শিক্ষয়িত্ৰী গৰাকী চুৰিয়া বেগম।
উল্লেখযোগ্য যে প্ৰয়াত বেগম নাজিৰা মহকুমাৰ মেছাগড় স্থিত নাজিৰা শিক্ষা খণ্ডৰ অধীনৰ বৰতল মুক্তাৱ প্ৰাথমিক বিদ্যালয়ৰ শিক্ষয়িত্ৰী আছিল আৰু ১৯৯৯ চনত নিযুক্তি লাভ কৰা শিক্ষয়িত্ৰী গৰাকীয়ে বৰ্তমানলৈকে কাৰ্য্যনিৰ্বাহ কৰি আছিল।
বহু দিন ধৰি ৰোগাক্ৰান্ত শিক্ষয়িত্ৰী গৰাকীক যোৱা ১৭ আগষ্টৰ দিনা শিৱসাগৰ অসামৰিক চিকিৎসালয়ৰ আই চি ইউত ভৰ্তি কৰোৱাৰ পিছতে দেওবাৰে ডিব্ৰুগড়ৰ সঞ্জিৱনী মেডিকেলত ভৰ্তি কৰাইছিল।
কিন্তু দুৰ্ভাগ্যবশত দেওবাৰে বিয়লি ৪ বজাত শিক্ষয়িত্ৰী গৰাকীৰ মৃত্যু হয়। ৫৮ বছৰীয়া এই গৰাকী বেতন বঞ্চিত শিক্ষয়িত্ৰীয়ে স্বামীৰ লগতে বহুটো আত্মীয়ক ইহ সংসাৰত এৰি থৈ গৈছে।
আনহাতে এনেদৰে এগৰাকী বেতন বঞ্চিত শিক্ষয়িত্ৰীয়ে উপযুক্ত চিকিৎসাৰ অভাৱত মৃত্যুক আঁকোৱালি ল’ব লগীয়া হোৱাত ক্ষুভিত হৈ পৰিছে শিৱসাগৰৰ বেতন বঞ্চিত শিক্ষক সমিতি।
আনকি ক্ষোভত সমিতিখনে চৰকাৰক প্ৰশ্ন কৰি কয় যে, ‘আৰু কিমান শিক্ষকৰ মৃত্যু হ’লে হৃদয় গলিব জাতি, মাটি, ভেটি ৰক্ষা আৰু পৰিৱৰ্তনৰ শ্ল’গানেৰে শাসনৰ গাদীলৈ অহা বিজেপি চৰকাৰৰ মন্ত্ৰী বিধায়ক তথা মুখ্য মন্ত্ৰীৰ।’
বৰ্তমানলৈকে চৰকাৰৰ বঞ্চনাৰ বলি হৈ বিনা বেতনেৰে ৩৪ গৰাকী শিক্ষকে মৃত্যুক আঁকোৱালি লোৱা বুলি সমিতিখনে উল্লেখ কৰি পুনৰ আন এগৰাকী শিক্ষয়িত্ৰীৰ মৃত্যুত তেওঁলোকে গভীৰ শোক প্ৰকাশ কৰাৰ লগতে প্ৰয়াত শিক্ষয়িত্ৰী গৰাকীৰ আত্মাৰ চিৰশান্তি কামনা কৰিছে।
আনহাতে বেতন বঞ্চিত শিক্ষক সমিতিৰ সম্পাদক বসন্ত নেওগে প্ৰয়াত শিক্ষয়িত্ৰী গৰাকীৰ মৃত্যু স্বাভাৱিক নহয় আৰু এই মৃত্যুৰ বাবে অসম চৰকাৰেই দায়ী বুলি দাবী কৰে।
