আইপিএল ২০২৫ত পিবিকেএছ বনাম এমআইৰ ৬৯ সংখ্যক মেচত পঞ্জাব কিংছে মুম্বাই ইণ্ডিয়ানছক ৭ উইকেটত পৰাস্ত কৰি শীৰ্ষত নিজৰ স্থান নিশ্চিত কৰিবলৈ সক্ষম হয়। এই মেচখনত এক বৃহৎ জয় লাভ কৰে পাঞ্জাব কিংছে। অৱশ্যে মুম্বাই পঞ্জাৱৰ হাতত পৰাস্ত হ’লেও টি-২০ ক্ৰিকেটত এক বৃহৎ বিশ্ব অভিলেখ ভংগ কৰি বিশ্ব ক্ৰিকেটত আলোড়নৰ সৃষ্টি কৰে সূৰ্য্য কুমাৰ যাদৱে।
পঞ্জাৱৰ বিৰুদ্ধে খেলখনত সূৰ্যকুমাৰ যাদৱে ৩৯টা বলত ৫৭ ৰান সংগ্ৰহ কৰে। তেওঁৰ ৬টা চাৰি আৰু ২টা ছয় সংগ্ৰহেৰে এই গুৰুত্বপূৰ্ণ ইনিংছত টি-২০ ক্ৰিকেটত একেৰাহে ২৫ তকৈ অধিক ৰান সংগ্ৰহ কৰি দক্ষিণ আফ্ৰিকাৰ অধিনায়ক টেম্বা বাভুমাৰ বিশ্ব অভিলেখ ভংগ কৰে।
উল্লেখ্য যে সূৰ্যকুমাৰ আৰু বাভুমাই ১৩টাকৈ ইনিংছত ২৫তকৈ অধিক ৰান সংগ্ৰহ কৰিছিল। কিন্তু এতিয়া সূৰ্য্যই পঞ্জাৱৰ বিৰুদ্ধে খেলখনত ৫৭ ৰানৰ ইনিংছ খেলি টি-২০ত সূৰ্য্যই একেৰাহে ১৪টা ইনিংছত ২৫তকৈ অধিক ৰান সংগ্ৰহ কৰি বাভুমাৰ অভিলেখ ভংগ কৰে।
ইয়াৰ উপৰিও ৩৩ বছৰীয়া বেটছমেনগৰাকীয়ে মুম্বাই ইণ্ডিয়ানছৰ হৈ এক বিশেষ কৃতিত্ব অৰ্জনেৰে আইপিএলৰ এটা ছিজনত মুম্বাই ইণ্ডিয়ানছৰ হৈ সৰ্বাধিক ৰান সংগ্ৰহকাৰী হিচাপে পৰিগণিত হয়। এই ছিজনত মুম্বাইৰ হৈ সূৰ্য্যই ১৪খন মেচত ৬৪০ ৰান সংগ্ৰহ কৰি ২০১০ চনৰ ছিজনত ৬১৮ ৰান সংগ্ৰহ কৰা মহান শচীন টেণ্ডুলকাৰৰো অভিলেখ ভংগ কৰে।
