সন্দেহযুক্ত আলফা (স্বা:) বিদ্ৰোহীয়ে দেওবাৰে নিশা ডিব্ৰুগড় জিলাৰ হাজুৱা চাহ বাগিচাত বাগিচাখনৰ সহকাৰী পৰিচালকে দাবী কৰা ধন দিবলৈ অস্বীকাৰ কৰাৰ পাছত শূন্যলৈ গুলীচালনা কৰে।
দেওবাৰে নিশা দুখন বাইকত উঠি অহা ব্যক্তিয়ে বাগিচাখনৰ ভিতৰলৈ সোমাই আহি বাগিচাৰ কাৰ্যালয়ৰ বাহিৰত থকা সুৰক্ষা কৰ্মীৰ পৰা আনোৱাৰৰ বিষয়ে জানিবলৈ বিচাৰে। সহকাৰী পৰিচালকজন নথকা বুলি জনোৱাত তেওঁলোকে শূন্যলৈ তিনি জাই গুলী চলাই ঘটনাস্থলীৰ পৰা পলাই যায়।
ঘটনাৰ খৱৰ পোৱাৰ পাছতে আৰক্ষী ঘটনাস্থলীত উপস্থিত হয় আৰু .২২ পিষ্টলৰ তিনিটা খালী কাৰ্টিজ উদ্ধাৰ কৰে। এই সন্দৰ্ভত মৰান আৰক্ষী থানাত এখন এজাহাৰ দাখিল কৰা হৈছে আৰু ঘটনাৰ অনুসন্ধান চলাই থকা হৈছে। ঘটনাৰ পাছতে চাহ বাগিচাখনৰ ভিতৰত নিৰাপত্তা ব্যৱস্থা কটকটীয়া কৰি তোলা হৈছে।
সূত্ৰসমূহৰ মতে কেইদিনমান আগতে আলফা স্বাধীনে হাজুৱা চাহ বাগিচাৰ সহকাৰী পৰিচালক শ্বাহনৱাজ আনোৱাৰৰ পৰা ৫ লাখ টকা দাবী কৰিছিল। বিদ্ৰোহী সংগঠনটোৱে দাবী কৰা ধন দিয়াৰ পৰিৱৰ্তে আনোৱাৰে মৰান আৰক্ষী থানাত এখন এজাহাৰ দাখিল কৰিছিল।
’সোমবাৰে মৰান আৰক্ষী থানাত এখন এজাহাৰ দাখিল কৰা হৈছিল। আমি বিষয়টোৰ অনুসন্ধান চলাই আছো আৰু আশা কৰিছো যে শীঘ্ৰে যোৱা নিশা হাজুৱা চাহ বাগিচাত শূন্যলৈ গুলীচালনা কৰা দুৰ্বৃত্তক কৰায়ত্ত কৰিব পাৰিম। ঘটনাৰ পাছতে আমি চাহ বাগিচাখনত নিৰাপত্তা ব্যৱস্থা কটকটীয়া কৰি তুলিছো,’’-মৰান আৰক্ষী থানাৰ আৰক্ষী বিষয়া এগৰাকীয়ে কয়।
ইপিনে, ম্যানমাৰত ম্যানমাৰ সেনাৰ আক্ৰমণত আলফা স্বাধীন আৰু আন বিদ্ৰোহী সংগঠন ব্যাপকভাৱে ক্ষতিগ্ৰস্ত হোৱাৰ পাছত বিদ্ৰোহী সংগঠনটো হতাশ হৈ পৰিছে আৰু ইয়াৰে কিছুমানে আত্মসমৰ্পণ কৰিছে।
সূত্ৰসমূহে কয় যে আলফা স্বাধীন আৰ্থিক সংকটত পৰিছে আৰু ইয়াৰ বাবেই তেওঁলোকে ধন দাবীৰ বাবে চাহ বাগিচাসমূহক লক্ষ্য কৰি লৈছে।
এইখিনিতে উল্লেখযোগ্য যে আলফা (স্বাধীন)ৰ নামত কিছুমান দুৰ্বৃত্তয়ো উজনি অসমৰ চাহ বাগিচাসমূহত ধন দাবী কাৰ্যত সক্ৰিয় হৈ পৰিছে।
