আজি পঞ্জাৱ আৰু দিল্লীৰ মাজত অনুষ্ঠিত হোৱা ৰঞ্জী ট্ৰফীৰ এখন খেলত ভুল সিদ্ধান্তৰে আউট দিয়া বাবে আম্পায়াৰক ধমক দিয়ে পাঞ্জাৱৰ অপেনিং বেটছমেন শুভমন গীলে।
ৰঞ্জী ট্ৰফীত আম্পায়াৰ হিচাপে অভিষেক ঘটোৱা আম্পায়াৰ পশ্চিম পাঠকে শুভমন গীলক এটা বলত ভুলকৈ আউট ঘোষণা কৰে।
আম্পায়াৰে আউট ঘোষণা কৰাৰ পাছতে গীলে তীব্ৰ অসন্তুষ্টি ব্যক্ত কৰে আৰু ক্ৰিজতে ৰৈ থাকে। তাৰ পাছত গীলে আম্পায়াৰ পাঠকৰ ওচৰলৈ আহি ধমক দিয়ে।
গীলৰ ধমকৰ পাছতে আম্পায়াৰে নিজৰ সিদ্ধান্ত সলনি কৰি পূৰ্বৰ সিদ্ধান্ত উঠাই লয়।
এইবাৰ আম্পায়াৰৰ সিদ্ধান্তৰ বিৰুদ্ধে দিল্লীৰ খেলুৱৈ সকলে অসন্তুষ্টি ব্যক্ত কৰে যাৰ বাবে খেলখন ১০ মিনিট সময় বন্ধ কৰিবলগীয়া হয়।
পৰৱৰ্তী সময়ত শুভমন গীলে পুনৰ বেটিং অব্যাহত ৰাখে যদিও বৃহৎ ইনিংছ খেলাত ব্যৰ্থ হয়।
২০ বছৰীয়া শুভমনে মাত্ৰ ২৩ ৰাণ কৰি আউট হয়।
উল্লেখযোগ্য যে, আম্পায়াৰৰ বিৰুদ্ধে কৰাৰ আচৰণৰ বাবে শুভমনে বি চি চি আইৰ তৰফৰ পৰা জৰিমনাৰ সন্মুখিন হ’বলগীয়া হ’ব পাৰে।
