মঙলদৈৰ মহৰ্ষি বিদ্যা মন্দিৰ খেল পথাৰত ৰাষ্ট্ৰীয় বজৰং দলে অস্ত্ৰ প্ৰশিক্ষণ শিবিৰ আয়োজন কৰা কাৰ্যত ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক স্তম্ভিত হৈ পৰিছে আৰু এই বে-আইনী কাৰ্যৰ লগত জড়িত সকলৰ বিৰুদ্ধে কঠোৰ ব্যৱস্থা ল’বলৈ দাবী জনাইছে।
উল্লেখ্য যে, মঙলদৈ চহৰৰ মাজ-মজিয়াত ৰাষ্ট্ৰীয় বজৰং দলৰ ৪০০ সদস্যক ২৭ জুলাইৰ পৰা ৩০ জুলাইলৈ আগ্নেয়াস্ত্ৰৰ প্ৰশিক্ষণ দিয়া হৈছিল।
প্ৰশ্ন হৈছে সহস্ত্ৰ প্ৰশিক্ষণ ল’বলৈ আৰক্ষী প্ৰশাসনে কেনেকৈ অনুমতি দিলে ? আৰু যদি অনুমতি দিয়া নাই তেন্তে এটা সংগঠনে কেনেকৈ অস্ত্ৰ প্ৰশিক্ষণ দিয়াৰ সুবিধা পালে ? যি সময়ত অন্য দল-সংগঠনে সাধাৰণ গণতান্ত্ৰিক প্ৰতিবাদী কাৰ্যসূচী হাতত ল’লেই আৰক্ষী বাহিনীয়ে শ শ আৰক্ষী জোৱান মোতায়ন কৰি প্ৰতিবাদ বন্ধ কৰিবলৈ উঠি-পৰি লাগে তেনে সময়ত বজৰং দলে সশস্ত্ৰ প্ৰশিক্ষণ লোৱাৰ সুবিধা কেনেকৈ পালে সেয়া প্ৰশ্নৰ বিষয় । সংবিধান বিৰোধী তথা বে-আইনী এই অনুষ্ঠানক লৈ আৰক্ষী বাহিনী আৰু মুখ্যমন্ত্ৰীয়ে নিমাত হৈ থকাটো দেশৰ আইন শৃংখলা আৰু আভ্যন্তৰিণ শান্তি-সম্প্ৰীতিৰ বাবে ডাঙৰ প্ৰত্যাহ্বান। সংবিধানৰ নামত শপত খোৱা মুখ্যমন্ত্ৰী হিমন্ত বিশ্ব শৰ্মাৰ শাসন কালত ৰাজ্যত মুকলি অস্ত্ৰ প্ৰশিক্ষণ দিয়াৰ পাছতো কোনো ব্যৱস্থা গ্ৰহণ নকৰাৰ অৰ্থই হৈছে দেখ-দেখ কৈ সংবিধান উলংঘা কৰা।
মুকলি অস্ত্ৰ প্ৰশিক্ষণৰ দৰে এনে এক স্পৰ্শকাতৰ বিষয়ত তৎকালে হস্তক্ষেপ কৰি কঠোৰ ব্যৱস্থা গ্ৰহণ কৰিবলৈ আৰক্ষী সঞ্চালক প্ৰধান জি পি সিঙৰ ওচৰত ডি ৱাই এফ আইয়ে দাবী জনাইছে।
আৰক্ষীয়ে যাতে আইন অনুসৰি কাম কৰিব পাৰে তাৰ ব্যৱস্থা কৰিবলৈও ডি ৱাই এফ আইয়ে মুখ্যমন্ত্ৰী হিমন্ত বিশ্ব শৰ্মাৰ ওচৰত দাবী উত্থাপন কৰিছে।
