তামুলপুৰ মহকুমাৰ অন্তৰ্গত নিজ ডেফেলীৰ বড়োলেণ্ড সমন্বয় পথাৰত অহা ৩, ৪ আৰু ৫ জানুৱাৰী অনুস্থিত হ’ব লগা তামুলপুৰ আঞ্চলিক এবছুৰ সোণালী জয়ন্তী বৰ্ষ অধিৱেশনৰ লাইখুটা স্থাপন কৰা হৈছে ৷
এক মাংগলিক পৰিবেশত সোণালী জয়ন্তী অধিৱেশনৰ লাইখুটা স্থাপন কৰে তামুলপুৰ সমষ্টিৰ বিধায়ক জলেন দৈমাৰীয়ে ৷
লাইখুটা স্থাপন কৰি বিধায়ক দৈমাৰীয়ে কয়, ৰাজ্যৰ এক বৃহৎ জাতীয় ছাত্ৰ সংগঠন নিখিল বড়ো ছাত্ৰ সন্থা ৷
ৰাজ্যত বসবাস কৰা বড়ো জনগোষ্ঠীৰ শৈক্ষিক, সামাজিক, অৰ্থনৈতিক, সাংস্কৃতিক উন্নয়ৰ বাবে দীৰ্ঘদিনে সংগ্ৰাম কৰি আহিছে নিখিল বড়ো ছাত্ৰ সন্থাই ৷
এবছুৰ নেতৃত্বত বড়ো জাতিৰ সৰ্বাংগীন উন্নয়নৰ বাবে কৰা দীৰ্ঘদিনীয়া সংগ্ৰামৰ অন্তত সম্প্ৰতি বড়ো জনগোষ্ঠীৰ ৰাইজে উন্নয়নৰ মুখ দেখিছে ৷
নিখিল বড়ো ছাত্ৰ সন্থাৰ অন্যতম তামুলপুৰ আঞ্চলিক সমিতিয়ে সোণালী জয়ন্তী বৰ্ষ অধিৱেশনৰ লাইখুটা স্থাপন কৰিবলৈ পাই অতিশয় আনন্দিত বুলি তেওঁ মন্তব্য কৰে৷
বিধায়ক জলেন দৈমাৰীয়ে পুনৰ কয়, বিগত সময়ছোৱাত তামুলপুৰৰ বড়ো সমাজৰ সৰ্বদিশৰ উন্নয়নৰ হকে সংগ্ৰাম কৰি সোণালী জয়ন্তী বৰ্ষত ভৰি দিয়া তামুলপুৰ অধিবেশনৰ মই সফলতা কামনা কৰাৰ লগতে এই অধিৱেশনে বৃহত্তৰ অঞ্চলটোলৈ সমন্বয়ৰ বাৰ্তা কঢ়িয়াই আনিব বুলি আশা কৰিছো ৷
উল্লেখ্য যে তিনিদিনীয়া বৰ্ণাঢ্য কাৰ্যসুচীৰে অনুস্থিত হ’ব লগা তামুলপুৰ আঞ্চলিক এবছুৰ সোণালী জয়ন্তী বৰ্ষ অধিৱেশনৰ মুকলি সভাৰ কাৰ্যসূচীত বিটিচি প্ৰধান প্ৰমোদ বড়োৰ লগতে ৰাজ্যৰ কেইবাটাও জাতীয় সংগঠনৰ শীৰ্ষ নেতৃত্বই অংশগ্ৰহণ কৰিব ৷
লাইখুটা স্থাপন অনুস্থানত অভ্যৰ্থনা সমিতিৰ সভাপতি মুন্টুচ ৰামছিয়াৰী, সম্পাদক প্ৰধান নিজৌম চৌৰাং বসুমতাৰী, তামুলপুৰ আঞ্চলিক এবছুৰ সভাপতি অজিত বড়ো, সাধাৰণ সম্পাদক বিপুল বসুমতাৰীৰ লগতে কেইবাগৰাকী নেতা-কৰ্মী উপস্থিত থাকে ৷
