টাটা গ্ৰুপে ৰাফেল যুদ্ধ বিমানৰ গুৰুত্বপূৰ্ণ যন্ত্ৰাংশ নিৰ্মাণ কৰিব। ইতিমধ্যে টাটা গ্ৰুপে ফ্ৰান্সৰ কোম্পানী ডাছ’ল্ট এভিয়েশ্যনৰ সৈতে ৰাফেল যুঁজাৰু বিমানৰ কিছু অংশ নিৰ্মাণৰ চুক্তিত স্বাক্ষৰ কৰিছে।
বৃহস্পতিবাৰে এই কথা ঘোষণা কৰে টাটা এডভান্সড চিষ্টেমছে। এই চুক্তিৰ জৰিয়তে টাটা গ্ৰুপৰ প্ৰতিৰক্ষা সঁজুলি নিৰ্মাণৰ পদক্ষেপ আৰু অধিক শক্তিশালী হৈছে। ইয়াৰ লগতে ‘মেক ইন ইণ্ডিয়া’ প্ৰতিৰক্ষা প্ৰকল্পই আৰু অধিক গতি লাভ কৰিলে।
টাটা এডভান্সড চিষ্টেমছৰ সৈতে ডাছ’ল্ট এভিয়েশনে চাৰিটা প্ৰডাকচন ট্ৰেন্সফাৰ চুক্তিত স্বাক্ষৰ কৰিছে। সেই চুক্তি অনুসৰি টাটা গ্ৰুপে ৰাফেলৰ ফিউজেজ নিৰ্মাণ কৰিব। অৰ্থাৎ টাটা এডভান্সড চিষ্টেমে যুদ্ধ বিমানখনৰ বডি শ্বেল বা গঠন নিৰ্মাণ কৰিব। যুঁজাৰু বিমানৰ বাহিৰৰ অংশতো বহুতো ভিন্ন অংশ থাকে। এই সকলোবোৰ নিৰ্মাণৰ বাবে টাটাই ফ্ৰান্সৰ কোম্পানীটোৰ সৈতে চুক্তিবদ্ধ হৈছে।
বিশেষজ্ঞসকলৰ মতে এই চুক্তিখন ভৱিষ্যতৰ বাবেও এক যুগান্তকাৰী হ’ব। কাৰণ এইবাৰ প্ৰথমবাৰৰ বাবে ৰাফেল যুঁজাৰু বিমানৰ কোনো অংশ ফ্ৰান্সৰ বাহিৰত নিৰ্মাণ কৰিবলৈ লোৱা হৈছে। বৰ্তমান ভাৰতীয় সেনাৰ হাতত থকা সকলো ৰাফেল যুদ্ধ বিমান ফ্ৰান্সত নিৰ্মিত।
ৰাফেল যুদ্ধ বিমান নিৰ্মাণৰ বাবে হায়দৰাবাদত এটা বিশেষ মেনুফেকচাৰিং ফেছিলিট স্থাপন কৰা হ’ব। ৰাফেলৰ গাঁথনিগত উপাদানসমূহ তাতেই নিৰ্মাণ কৰা হ’ব। এই সন্দৰ্ভত ডাছল্ট এভিয়েশনৰ চিইঅ’ এৰিক ট্ৰেপিয়াৰে কয়, ‘এই পদক্ষেপে ভাৰতৰ সৈতে আমাৰ যোগান শৃংখল আৰু অধিক শক্তিশালী কৰিব। টাটা ভাৰতৰ অন্যতম বৃহৎ ঔদ্যোগিক গোষ্ঠী।’
