টাটা মটৰ্ছে মঙলবাৰে (৩ জুন) ভাৰতীয় বজাৰত আনুষ্ঠানিকভাৱে মুকলি কৰে নিজৰ নতুন ইলেক্ট্ৰিক গাড়ী টাটা হেৰিয়াৰ ইভি ২০২৫ (Tata Harrier EV)। বহু অপেক্ষাৰ অন্তত অৱশেষত এই গাড়ীখন বজাৰলৈ আহিছে, যিখন গাড়ী টাটাৰ ফ্লেগশ্বিপ ইলেক্ট্ৰিক এছ ইউ ভি হিচাপেই বজাৰলৈ আহিছে। কোম্পানীটোৱে জনোৱা মতে, গাড়ীখন এবাৰ চাৰ্জতে প্ৰায় ৫৫০ কিলোমিটাৰলৈকে যাব পাৰে।
নতুন হেৰিয়াৰ ইভিৰ ৰূপটো ইয়াৰ পূৰ্বৰ ডিজেল বা পেট্ৰ’ল চালিত হেৰিয়াৰ এছ ইউ ভিৰ দৰেই। কিন্তু যিহেতু ই বৈদ্যুতিক, গতিকে কিছুমান গুৰুত্বপূৰ্ণ পৰিৱৰ্তনো কৰা হৈছে। ইয়াৰ ভিতৰত আছে বন্ধ ফ্ৰন্ট গ্ৰীল, যিয়ে গাড়ীৰ গতি বজাই ৰখাত সহায় কৰে আৰু ৰেঞ্জ বৃদ্ধি কৰে। নতুনকৈ ডিজাইন কৰা চকাত অবিৰতভাৱে এল ই ডি ডি আৰ এল লাইট, চোকা টেইললেম্প, এয়াৰফ্ল’-ফ্ৰেণ্ডলী মল্ডিং আৰু গাড়ীখনত বিশেষ ই ভি ল’গ’ আছে।
গাড়ীৰ ভিতৰৰ ফালেও কেইবাটাও আপডেট আছে। ইয়াত ১২.৩ ইঞ্চিৰ টাচস্ক্ৰীণ ডিছপ্লেৰ লগতে ডিজিটেল ড্ৰাইভাৰৰ স্ক্ৰীণ আছে। ইয়াৰ উপৰিও গাড়ীখনত নতুনকৈ ডিজাইন কৰা চাৰিটা স্প’ক ষ্টিয়াৰিং, পেনোৰামিক ছানৰুফ, অভাৰ-দ্য-এয়াৰ চফটৱেৰ আপডেট আৰু ইভি ভিত্তিক ড্ৰাইভিং মোডৰ বৈশিষ্ট্য আছে।
টাটাৰ নতুন Acti.ev প্লেটফৰ্মত নিৰ্মাণ কৰা হৈছে হেৰিয়াৰ ইভি, যিটো মূলতঃ ইলেক্ট্ৰিক বাহনৰ বাবে ডিজাইন কৰা হৈছে। গাড়ীখনত দুটা ইলেক্ট্ৰিক মটৰ আছে, অৰ্থাৎ গাড়ীখন অল হুইল ড্ৰাইভ (AWD)। ইয়াৰ ফলত প্ৰায় ৫০০এনএম টৰ্ক উৎপন্ন হ’ব, যাৰ ফলত বিশেষকৈ অফ-ৰোড বা বাৰিষাৰ সময়ত গাড়ী চলোৱাৰ অভিজ্ঞতা বহুত সহজ কৰ তুলিব।
যদিও টাটাই বেটাৰীৰ সঠিক স্পেচিফিকেশন এতিয়াও প্ৰকাশ কৰা নাই, তথাপিও কোম্পানীটোৱে দাবী কৰিছে যে এই গাড়ীখনে এবাৰ চাৰ্জত ৫৫০ কিলোমিটাৰতকৈ অধিক দৌৰিব পাৰিব। ভাৰতৰ ৰাস্তা-ঘাটৰ কথা মনত ৰাখি নিৰ্মাণ কৰা টাটাৰ নিজা পৰীক্ষামূলক চাইকল C75 অনুসৰি এই ৰেঞ্জ গণনা কৰা হৈছে।
মূল্যৰ ক্ষেত্ৰত এতিয়াও বিশেষ একো ঘোষণা কৰা হোৱা নাই যদিও প্ৰথম অৱস্থাত এই মূল্য ২৪ লাখৰ পৰা ২৮ লাখ টকাৰ ভিতৰত হ’ব পাৰে বুলি ধাৰণা কৰা হৈছে। বিভিন্ন ভেৰিয়েন্ট অনুসৰি দাম বেলেগ বেলেগ হ’ব।
সামগ্ৰিকভাৱে টাটা হেৰিয়াৰ ইভি হৈছে ভৱিষ্যতৰ প্ৰতি দৃষ্টি ৰাখি নিৰ্মাণ কৰা এখন শক্তিশালী, আধুনিক আৰু পৰিৱেশ অনুকূল এছ ইউ ভি। বিশেষজ্ঞসকলে বিশ্বাস কৰে যে প্ৰযুক্তি, পাৰফৰমেন্স আৰু টাটা ব্ৰেণ্ডৰ আস্থাৰ সংমিশ্ৰণেৰে ই ভাৰতৰ বৈদ্যুতিক বাহনৰ জগতখনত যথেষ্ট প্ৰভাৱ পেলাব।
