হাফলঙত ৫৯ সংখ্যক শিক্ষক দিৱস উদযাপন
মৰণব্যাধি ক’ৰনা পৰিস্থিতিৰ মাজত সমগ্ৰ দেশৰ লগত সামঞ্জস্য ৰাখি আজি পাহাৰীয়া ডিমা হাছাও জিলাত ৫৯ সংখ্যক শিক্ষক দিৱস উদযাপন কৰা হয়।
হাফলঙৰ চৰকাৰী ছোৱালী উচ্চতৰ মাধ্যমিক বিদ্যালয়ৰ অডিট’ৰিয়ামত জিলা পৰ্যায়ত শিক্ষক দিৱসৰ অনুষ্ঠানৰ আয়োজন কৰা হয়।
পাৰ্বত্য স্বায়ত্ব শাসিত পৰিষদৰ প্ৰধান সচিব অমিতাভ ৰাজখোৱাৰ সভাপতিত্বত অনুষ্ঠিত অনুষ্ঠানত মুখ্য অতিথি হিচাপে উপস্থিত থাকে উত্তৰ কাছাৰ পাৰ্বত্য স্বায়ত্ব শাসিত পৰিষদৰ শিক্ষা বিভাগৰ ইএম নন্দিতা গার্লছা।
সন্মানীয় অতিথি হিচাপে উপস্থিত থাকে পৰিষদৰ শিক্ষা বিভাগৰ সচিব এল জেদ নাম্পুই আৰু ডিমা হাছাও জিলাৰ অতিৰিক্ত উপায়ুক্ত প্ৰাঞ্জল দাস, বিদ্যালয় সমূহৰ পৰিদৰ্শক বীৰেন সিং ইংতি, জিলা একাডেমী কাউন্সিল সচিব কৃষ্ণা ছেত্ৰী, হাফলং চৰকাৰী কলেজৰ অধ্যক্ষ ডা: মিজানুৰ ৰহমান, হাফলং ছোৱালী উচ্চতৰ মাধ্যমিক বিদ্যালয়ৰ অধ্যক্ষ সমীৰ মজুমদাৰ আদি ব্যক্তিসকল।
অনুষ্ঠানৰ আৰম্ভণিত ড.সৰ্বপল্লী ৰাধাকৃষ্ণণৰ প্ৰতিকৃতিত পুষ্পাৰ্ঘ নিবেদন কৰে প্ৰধান অতিথিৰ লগতে আন আন অতিথি আৰু শিক্ষক সকলে।
অনুষ্ঠানত হাইস্কুল আৰু হায়াৰ চেকেণ্ডেৰী পৰীক্ষাত ভাল ফলাফল প্ৰদৰ্শন কৰা তিনিখন বিদ্যালয় ক্ৰমে চেন্ট এগনেছ এইছ এছ স্কুল,ডনবস্ক’ এইচ্ছ এছ স্কুল আৰু উমৰাংছু হাইস্কুল প্ৰধানক পুৰস্কাৰ হিচাবে মেমেন্ট’ দিয়া হয়।
একে দৰে হাফলং চৰকাৰী কলেজ আৰু উমৰাংছুৰ জে বি হাগজেৰ মেম’ৰিয়াল কলেজৰ অধ্যক্ষক উক্ত পুৰস্কাৰ তুলি দিয়া হয়।
ইয়াৰ উপৰি হাইস্কুল শিক্ষান্ত পৰীক্ষাত ভাল ফলাফল কৰা ১২ গৰাকী আৰু হায়াৰ চেকেণ্ডেৰী পৰীক্ষাত ভাল ফলাফল প্ৰদৰ্শন কৰা ৭ গৰাকী ছাত্ৰ-ছাত্ৰীক সম্বৰ্ধনা জনোৱা হয়।
প্ৰধান অতিথি পাৰ্বত্য স্বায়ত্ব শাসিত পৰিষদৰ ইএম নন্দিতা গার্লছায় জিলাৰ শিক্ষক সমাজক শিক্ষক দিৱসৰ শুভেচ্ছা আৰু অভিনন্দন জ্ঞাপন কৰি কয় যে শিক্ষকতাই এনে এখন পেছা যত আজিৰ দিনতো সম্মান আছে।
তেওঁ কয় শিক্ষকই এটা জাতি তথা এখন সভ্য সমাজৰ মেৰুদণ্ড।
আমি আজি এক কঠিন পৰিস্থিতিৰ মাজেৰে যাব লগা হৈছে যদিও কিন্তু শিক্ষক সমাজে অনলাইন ব্যবস্থাৰে পাঠদানত লাগি আছে।
আগতে আমি ছাত্ৰ ছাত্ৰী বা নিজ সন্তানক মোবাইল ফোনৰ পৰা আঁতৰাই ৰাখিছিলো। কিন্তু আজি আমি অনলাইন শ্ৰেণীৰ কাৰণে তেওঁলোকৰ হাতত মোবাইল ফোন তুলি দিব লগা হৈছে।
তেওঁ লগতে কেন্দ্ৰ চৰকাৰৰ নতুন শিক্ষা নীতিক লৈ আশা ব্যক্ত কৰি কয় যে ইয়াৰ পৰা ছাত্ৰ সমাজ উপকৃত হ’ব।
কাৰণ ৩৬ বছৰ পাছত নতুন শিক্ষা আহি আছে।অনুষ্ঠানত বক্তব্য ৰাখে প্ৰধান সচিব অমিতাভ ৰাজখোৱা, এল জেদ নাম্পুই, বীৰেন সিং ইংতিয়েও।