এইবাৰ ভাৰতীয় ক্ৰিকেটৰ অন্যতম জনপ্ৰিয় ব্যক্তিত্ব গৌতম গম্ভীৰক সন্ত্ৰাসবাদী সংগঠন ‘আইছিছ কাশ্মীৰ’য়ে হত্যাৰ ভাবুকি প্ৰদান কৰিছে বুলি প্ৰাক্তন ক্ৰিকেটাৰগৰাকীৰ কাৰ্যালয়ৰ সূত্ৰই প্ৰকাশ কৰিছে।
বাতৰি মতে, বুধবাৰে গম্ভীৰে ভাবুকি লাভ কৰি দিল্লী আৰক্ষীৰ কাষ চাপিছিল। এফআইআৰ দাখিল কৰা হৈছে। লগতে পৰিয়ালৰ সুৰক্ষাৰ বাবেও আবেদন জনায়। সূত্ৰ অনুসৰি পেহেলগাম আক্ৰমণৰ কিছু সময়ৰ পিছতে গম্ভীৰে এই ভাবুকি লাভ কৰিছিল।
জানিব পৰা মতে, ২২ এপ্ৰিলত দুটা ইমেইলৰ জৰিয়তে তেওঁ এই ভাবুকি লাভ কৰিছিল। এটা দুপৰীয়া আৰু আনটো সন্ধিয়া। দুয়োটাতে “আই কিল ইউ” বুলি লিখা আছিল।
অৱশ্যে এইটো প্ৰথম নহয়, ইয়াৰ পূৰ্বে ২০২১ চনৰ নৱেম্বৰ মাহতো তেওঁক ভাবুকি দিয়া হৈছিল। সেই সময়ত তেওঁ সাংসদও আছিল। কিছু পৰিমাণে একেধৰণৰ ভাবুকি পাইছিল। উল্লেখ্য যে ভাৰতীয় ক্ৰিকেট দলৰ মুখ্য প্ৰশিক্ষক তথা বিজেপিৰ প্ৰাক্তন সাংসদ গৌতম গম্ভীৰে মঙলবাৰে কাশ্মীৰৰ পেহেলগামৰ বৈছৰণ উপত্যকাত সংঘটিত সন্ত্ৰাসবাদী আক্ৰমণক তীব্ৰ গৰিহণা দিয়ে। ভাৰতে প্ৰত্যুত্তৰ দিব বুলি হুংকাৰ দিয়ে।
