ৰাজ্যখনৰ নিবনুৱা যুৱক-যুৱতীসকলক স্ব-নিয়োজনৰ ক্ষেত্ৰত আগ্ৰহী কৰি তোলাৰ বাবে বোকাখাতত থকা ইউনাইটেত গ্ৰাম্য স্ব-ৰোজগাৰ প্ৰশিক্ষণ প্ৰতিষ্ঠানত আজিৰ পৰা দহ দিনীয়া কাৰ্য্যসূচীৰে দুটা প্ৰশিক্ষণ শিৱিৰ আৰম্ভ কৰা হৈছে।
প্ৰশিক্ষণ শিৱিৰত গাহৰি পালন আৰু প্ৰধান মন্ত্ৰী নিয়োগ নিশ্চিতকৰণ আঁচনিৰ সন্দৰ্ভত অংশগ্ৰহণকাৰী সকলক প্ৰশিক্ষণ প্ৰদান কৰা হ’ব। প্ৰধান মন্ত্ৰী নিয়োগ নিশ্চিতকৰণ আঁচনিৰ প্ৰশিক্ষণত মুঠ ২২ গৰাকী প্ৰশিক্ষাৰ্থীয়ে অংশগ্ৰহণ কৰাৰ বিপৰীতে গাহৰি পালন প্ৰশিক্ষণৰ বাবে ৩৫ গৰাকী প্ৰশিক্ষাৰ্থীয়ে অংশ গ্ৰহণ কৰিছে।
গোলাঘাট জিলাৰ বিভিন্ন ঠাইৰ পৰা অহা প্ৰশিক্ষাৰ্থী সকলৰ বাবে আৰম্ভ কৰা প্ৰশিক্ষণ কাৰ্যসূচীৰ শুভৰাম্ভণি অনুষ্ঠানত মুখ্য অতিথি হিচাবে অংশ গ্ৰহন কৰে বোকাখাতৰ মহকুমা উদ্যোগ বিষয়া প্ৰশান্ত বৰাই।
অনুষ্ঠানটোৰ আঁত ধৰে গ্ৰাম্য স্ব-ৰোজগাৰ প্ৰশিক্ষণ প্ৰতিষ্ঠানৰ সঞ্চালক বিদ্যুত খাটনিয়াৰে৷ গ্ৰাম্য স্ব-ৰোজগাৰ প্ৰশিক্ষণ প্ৰতিষ্ঠানৰ হিমাশ্ৰী শইকীয়াই আজিৰ দিনটোৰ প্ৰশিক্ষণৰ সমল ব্যক্তি হিচাবে উপস্থিত থাকে।
আনহাতে, প্ৰশিক্ষণ শিৱিৰৰ আৰম্ভণি অনুষ্ঠানত অংশগ্ৰহন কৰা উদ্যোগ বিষয়া প্ৰশান্ত বৰাই প্ৰশিক্ষাৰ্থী সকলক উদ্যোগী হিচাপে প্ৰতিষ্ঠিত হ’বৰ বাবে আৱশ্যকীয় অৰ্হতা গ্ৰহণৰ ওপৰত বিশেষ গুৰুত্ব প্ৰদান কৰে।
আজিৰ পৰা অনুষ্ঠিত হোৱা দহদিনীয়া প্ৰশিক্ষণ শিৱিৰটো ২৩ মে’ত সামৰণি পৰিব।
