টীয়ক সমষ্টিৰ অন্তৰ্গত বানেগৰকা জাঁজীমুখৰ গৰখাৱৈপাৰৰ তপতপি গাঁৱৰ ৰাইজে চৰকাৰী সা-সুবিধাৰ পৰা বঞ্চিত হৈ থাকিব লগা হোৱাত এতিয়া ক্ষোভৰ সৃষ্টি হৈছে।
এই গাঁও খনৰ প্ৰায় ৭৫ টা পৰিয়ালৰ জীৱন জীৱিকাৰ একমাত্ৰ সমল হ’ল খেতি পথাৰ। গৰু , ছাগলী পালন কৰিয়েই কোনোমতে পেটে ভাতে খাই আছে এইসকল জনতাই।
চৰকাৰে ঘোষণা কৰা অৰুণোদয়,উজ্বলা,গৃহ,খোৱা পানী তথা বাট পথ বিজুলি আদি কৰি একোৱেই সুবিধা নাই এই গাঁৱখনত।জনপ্ৰতিনিধি তথা উৰ্ধতম কৰ্তৃপক্ষক বহুবাৰ আবেদন নিবেদন কৰাৰ পাছতো আজি স্বাধীনতাৰ ৭৫ বছৰৰ এই অমৃত মহোৎসৱ উদযাপনৰ সময়তো এইসকললোক চৰকাৰী অভিলাষী সা সুবিধাৰ বাবে হাহাকাৰ কৰিবলগীয়া হৈছে।
উপায়হীন ৰাইজে আজি পুৱা গাঁৱৰ নামঘৰ প্ৰাংগণত সমবেত হৈ অহা ১৫ আগষ্টৰ পূৰ্বে জিলা প্ৰশাসন বা সংশ্লিষ্ট কৰ্তৃপক্ষই গাঁওখনৰ সমস্যা সমাধানৰ প্ৰতিশ্ৰুতি নিদিয়ে তেন্তে স্বাধীনতা দিৱস বৰ্জন কৰি উক্ত দিনা প্ৰতিবাদী কাৰ্যসূচী গ্ৰ্ৰহণৰ ভাবুকি প্ৰদান কৰিছে।
