অতি সোনকালেই ভাৰতলৈ আহিব টেছলা, মোডীৰ লগত আলোচনা ইলন মাস্কৰ
আমেৰিকা যুক্তৰাষ্ট্ৰত প্ৰধানমন্ত্ৰী নৰেন্দ্ৰ মোডীৰ সৈতে সাক্ষাৎ কৰাৰ পিছত মঙলবাৰে টেছলাৰ মুখ্য কাৰ্যবাহী বিষয়া ইলন মাস্কে প্ৰকাশ কৰে যে অতি সোনকালেই ভাৰতৰ বজাৰত টেছলা নামৰ বিলাসী গাড়ীখন মুকলি কৰিব।
চাৰিদিনীয়া ভ্ৰমণ কাৰ্যসূচীৰে মঙলবাৰে আমেৰিকাত উপস্থিত হোৱা প্ৰধানমন্ত্ৰী নৰেন্দ্ৰ মোদীৰ সৈতে হোৱা বৈঠকৰ পিছতে ল’টে নিউয়ৰ্ক পেলেচৰ বাহিৰত সাংবাদিকৰ আগত এই কথা সদৰী কৰে ইলন মাস্কে।
ইফালে, মাস্কৰ সৈতে হোৱা সাক্ষাৎৰ পিছত প্ৰধানমন্ত্ৰী মোদীয়ে টুইট কৰি কয় যে, “আজি আপোনাক বহুত ভাল লগ পালোঁ! শক্তিৰ পৰা আৰম্ভ কৰি আধ্যাত্মিকতালৈকে বিভিন্ন বিষয়ত আমি বহু কথা-বতৰা পাতিলোঁ।”
মাস্কে কয় যে প্ৰধানমন্ত্ৰী মোদীয়ে তেওঁক ভাৰতলৈ নিমন্ত্ৰণ জনাইছে আৰু অহা বছৰ ভাৰতলৈ অহাৰ পৰিকল্পনা কৰিছে।
“মই অহা বছৰ ভাৰত ভ্ৰমণৰ পৰিকল্পনা কৰিছোঁ। মোৰ বিশ্বাস যে টেছলা ভাৰততো উপলব্ধ হ’ব আৰু মই যিমান পাৰোঁ সিমান সোনকালে ভাৰতৰ বজাৰত টেছলা মুকলি কৰাৰ বাবে চেষ্টা কৰিছোঁ।” – ইলন মাস্কে এইদৰে কয় ।
লগতে মাস্কে কয় , “প্ৰধানমন্ত্ৰী মোডীক তেওঁৰ সমৰ্থনৰ বাবে ধন্যবাদ জনাইছো আৰু আশাকৰোঁ, ভৱিষ্যতে আমি কিবা এটা ঘোষণা কৰিবলৈ সক্ষম হ’ম।’’
মাস্কে লগতে উল্লেখ কৰে যে ২০১৫ চনত প্ৰধানমন্ত্ৰী মোডীয়ে কেলিফৰ্ণিয়াৰ ফ্ৰীমণ্টৰ টেছলা মটৰ্ছৰ কাৰখানা ভ্ৰমণ কৰিছিল।
আনহাতে টুইটাৰৰো স্বতাধিকাৰী মাস্কে টুইটাৰ সন্দৰ্ভত কয়, “টুইটাৰৰ হাতত স্থানীয় চৰকাৰক মানি চলাৰ বাহিৰে আন উপায় নাই। যদি আমি স্থানীয় চৰকাৰৰ আইন মানি নলওঁ তেন্তে আমি বন্ধ হৈ যাম। গতিকে আমি কৰিব পৰা সৰ্বোত্তম কামটো হ’ল যিকোনো এখন দেশৰ আইনৰ হৈ কাম কৰা। আইনৰ অধীনত থাকি সম্ভৱপৰ মুক্ত বাক্য প্ৰদানৰ বাবে আমি আমাৰ সকলো চেষ্টা কৰিম।’’