গুৱাহাটীবাসীৰ পানীৰ সমস্যা সমাধানৰ দাবীত আপ অসমে ধাৰাবাহিক ভাৱে প্ৰতিবাদ সাব্যস্ত কৰিছে। যোৱা কালি জনতা ভৱনৰ সম্মুখত প্ৰতিবাদ সাব্যস্ত কৰাৰ পিছত আজি পুনৰ আপ,অসমৰ সদস্য গুৱাহাটী পৌৰ নিগমৰ কাৰ্যালয় ঘেৰাও কৰি প্ৰতিবাদী কাৰ্যসূচী পালন কৰে। প্ৰতিবাদকাৰীসকলে গুৱাহাটীবাসীক পানী দিয়ক, মেয়ৰ মৃগেন শৰণীয়াই গুৱাহাটী বাসীক ক্ষমা খোজক, মন্ত্ৰী অশোক সিংঘালে পদত্যাগ কৰক, সাংসদ কুইন ওজাই পদত্যাগ কৰক,বিজেপি চৰকাৰ মূৰ্দাবাদ, জিএম্ চি হুছিয়াৰ, মুখ্যমন্ত্ৰী হায় হায় – গুৱাহাটী বাসীৰ পানী নাই আদি শ্লোগান দি হাতে হাতে প্লে – কাৰ্ড আৰু বাল্টিলৈ ভঙাগড়স্থিত পৌৰ নিগমৰ কাৰ্যালয় ঘেৰাও কৰে।
প্ৰতিবাদত অংশ গ্ৰহণ কৰা আপ, অসমৰ ৰাজ্যিক উপ সভাপতি জিতুল ডেকাই কয় যে – পানী যোগানৰ দাবীত আপ অসমে ধাৰাবাহিক ভাৱে পানী আন্দোলন গঢ়ি তুলিছিল। আপৰ সদস্য সকলে গুৱাহাটীৰ বাসিন্দা সকলৰ মতামত গ্ৰহন কৰি পানীৰ সমস্যাৰ বিষয়ে তথ্য সংগ্ৰহ কৰিছিল।মুখ্য মন্ত্ৰীয়ে জাইকাৰ পানী যোগান আঁচনি মুকলি কৰি পানী যোগানৰ আশ্বাস দিয়াত আপ অসমে আশা কৰিছিল যে এই আঁচনিৰ পৰা ৰাইজে পানী পাব। কিন্তু আঁচনি মুকলি কৰাৰ পিছতো গুৱাহাটীৰ বাসিন্দা সকলে এটুপি পানীৰ বাবে হাহাকাৰ কৰিব লগা হৈছে।পানী যোগান দিব বুলি প্ৰতিশ্ৰুতি দিয়া ৭বছৰীয়া বিজেপি চৰকাৰ খনে গুৱাহাটী মহানগৰবাসীক প্ৰবঞ্চনা কৰিছে। এইখন চৰকাৰ কেৱল প্ৰতিশ্ৰুতিৰ চৰকাৰ। ডাবল ইঞ্জিন চৰকাৰ বুলি কোৱা বিজেপি চৰকাৰ খনে গুৱাহাটীৰ কাষেৰে বিশাল ব্ৰহ্মপুত্ৰ বৈ যোৱাৰ পিছতো ইয়াৰ পানী সংশোধন কৰি গুৱাহাটীবাসীক পানী যোগান ধৰিব নোৱাৰাটো চৰকাৰৰ অন্যতম বিফলতা। পানী যোগান আঁচনি ৰূপায়ন কৰা প্ৰতিষ্ঠান সমূহৰ লগত কমিচনৰ অংক কৰাৰ কাৰণে আজিলৈ আঁচনিৰ জড়িয়তে পানী পোৱা নাই। পানী যোগান দিব নোৱাৰা চৰকাৰে এতিয়া মৃত্যু উপহাৰ দিছে।গুৱাহাটী বাসীৰ মৌলিক প্ৰয়োজন এটুপি খোৱা যোগান দিব নোৱাৰা পৌৰ নিগমৰ মেয়ৰ মৃগেন শৰণীয়াই জনসাধাৰণৰ মূৰত কেৱল কৰৰ বোজা জাপি দিয়েই দায়িত্ব পালন কৰিছে। পৌৰ নিৰ্বাচনৰ প্ৰচাৰৰ সময়ত পানী যোগানৰ প্ৰতিশ্ৰুতি দিয়া গুৱাহাটীৰ সাংসদ কুইন ওজা আৰু মেয়ৰ মৃগেন শৰণীয়াই গুৱাহাটীবাসীক ক্ষমা খুজি পদত্যাগ কৰিব লাগে। খোৱা পানীৰ সমস্যাৰ কথা কলে সততে পানী যোগানৰ প্ৰতিশ্ৰুতি দিয়া গুৱাহাটী উন্নয়ন বিভাগৰ অকৰ্মন্য, অদক্ষ মন্ত্ৰী অশোক সিংঘালক অনতিপলমে মন্ত্ৰীত্বৰ পৰা বৰ্খাস্ত কৰিবলৈ মুখ্যমন্ত্ৰীক দাবী জনায়।
চৰকাৰে পানী যোগান ধৰিব পৰা নাই কাৰণে ইয়াৰ সুবিধা লৈ এক ব্যক্তিগত পানী যোগান চিন্দিকেত চক্ৰ গড় লৈ উঠিছে যিটো চক্ৰই মই মতালিৰে উচ্চ দৰত ৰাইজক হাৰাশাস্তি কৰিছে।গুৱাহাটীবাসীৰ পানীৰ সমস্যা সমাধান কৰিবলৈ আপ, অসমে চৰকাৰক দাবী জনোৱাৰ লগতে ইয়াৰ দাবীত ধাৰাবাহিক প্ৰতিবাদ চলি থাকিব বুলি মন্তব্য কৰে।
