দিল্লী বিশ্ববিদ্যালয়ৰ একাডেমিক কাউন্সিলে মনোবিজ্ঞানৰ পাঠ্যক্ৰমত এক বৃহৎ পৰিৱৰ্তন সাধন কৰিছে। ২০২৫ চনৰ ৩ মে’ত একাডেমিক পৰিক্ৰমাৰ স্থায়ী সমিতিয়ে কাশ্মীৰ বিষয় আৰু ইজৰাইল-পেলেষ্টাইন সংঘাতৰ দৰে বিষয়সমূহ “শান্তিৰ মনোবিজ্ঞান” পাঠ্যক্ৰমৰ পৰা আঁতৰোৱাৰ সিদ্ধান্ত গ্ৰহণ কৰিছে। কমিটীৰ অধ্যক্ষ অধ্যাপক প্ৰকাশ সিঙে কয় যে এই বিষয়সমূহৰ প্ৰয়োজন নাই কাৰণ “কাশ্মীৰৰ সমাধান হ‘ল” আৰু ইজৰাইল-পেলেষ্টাইনৰ বিষয়ে শিকোৱাৰ প্ৰয়োজন নাই। বৰঞ্চ মহাভাৰত, ভাগৱত আদি ভাৰতীয় গ্ৰন্থৰ পৰা পাঠ একত্ৰিত কৰি ভাৰতীয় ধাৰণা ব্যৱহাৰ কৰি ছাত্ৰ-ছাত্ৰীক শান্তিৰ বিষয়ে শিকাব বিচাৰে।
সম্প্ৰতি এই সিদ্ধান্তই বহু বিতৰ্কৰ সৃষ্টি কৰিছে। ড° মোনামি সিনহাৰ দৰে একাংশ শিক্ষাবিদে এই বিষয়বোৰ আঁতৰাই দিলে ছাত্ৰ-ছাত্ৰীৰ বাস্তৱ জগতৰ সংগ্ৰামৰ বুজাবুজি সীমিত হৈ পৰে আৰু শৈক্ষিক স্বাধীনতা হ্ৰাস পাব বুলি উদ্বেগ প্ৰকাশ কৰিছে। তেওঁ লগতে কয় যে ডেটিং এপৰ দৰে বিষয়, যিবোৰো আঁতৰাই দিয়া হৈছিল, যিবিলাক আজিৰ যুৱক-যুৱতীসকলে সন্মুখীন হোৱা মানসিক স্বাস্থ্যজনিত সমস্যাৰ বিষয়ে জানিবলৈ ছাত্ৰ-ছাত্ৰীসকলৰ বাবে গুৰুত্বপূৰ্ণ। কিন্তু কমিটীয়ে বিশ্বাস কৰে যে ভাৰতীয় গ্ৰন্থসমূহৰ ওপৰত গুৰুত্ব দিলে ছাত্ৰ-ছাত্ৰীসকলে পশ্চিমীয়া ধাৰণাতকৈ ভাৰতীয় মূল্যবোধ আৰু পৰম্পৰাৰ সৈতে ভালদৰে সংযোগ স্থাপন কৰাত সহায় কৰিব বুলি মত প্ৰকাশ কৰিছে। এনে বাক বিতন্দাৰ মাজতে পুনৰ পাঠ্যক্ৰমৰ পৰ্যালোচনাৰ বাবে নতুন কমিটী গঠন কৰা হৈছে।
এই পৰিৱৰ্তনে আধুনিক শিক্ষা আৰু পৰম্পৰাগত মূল্যবোধৰ মাজত ভাৰসাম্য ৰক্ষাৰ ওপৰত প্ৰশ্ন উত্থাপন কৰিছে। জীৱন আৰু শান্তিৰ বিষয়ে মহাভাৰত আৰু গীতাত বহু কথাই উল্লেখ আছে যদিও কাশ্মীৰ, পেলেষ্টাইনৰ দৰে বিশ্ব সংঘাতক আওকাণ কৰিলে আজিৰ পৃথিৱীৰ গুৰুত্বপূৰ্ণ বিষয়সমূহৰ বিষয়ে শিক্ষাৰ্থীসকলক বঞ্চিত কৰিব পাৰি বুলি বহুলোকে বিশ্বাস কৰে। নতুন কমিটীয়ে প্ৰতিবেদন দাখিল কৰাৰ পিছত চূড়ান্ত সিদ্ধান্ত গ্ৰহণ কৰা হ’ব। যদিও ইতিমধ্যে বিশ্ববিদ্যালয়ত ছাত্ৰ-ছাত্ৰীসকলে কি শিকিব লাগে এই বিষয়টোৱে এতিয়া ব্যাপক চৰ্চা লাভ কৰিছে।
