ৰাজ্যৰ অভাৱনীয় বান পৰিস্থিতি নিয়ন্ত্রণ নোহোৱা পর্যন্ত এপিএছচিৰ (সংযুক্ত প্রতিযোগিতামূলক পৰীক্ষা) ২০২৫ বৰ্ষৰ প্ৰাৰম্ভিক পৰীক্ষা স্থগিত ৰাখিবলৈ আহ্বান জনাইছে জাতীয় যুৱ বাহিনীয়ে।
আজি সংবাদ মাধ্যমলৈ প্ৰেৰণ কৰা এক বিবৃতিত ৰাইজৰ দলৰ ভাতৃ সংগঠনটোৱে উল্লেখ কৰে যে সমগ্ৰ ৰাজ্যত এতিয়া প্রলয়ংকাৰী বানৰ তাণ্ডৱ, উজনিৰ পৰা নামনিলৈকে বহু ঠাই বানৰ কৱলত পৰিছে। ৰাজ্যৰ এই বান পৰিস্থিতিৰ মাজতেই এতিয়া অসম চৰকাৰে আগন্তুক ৮ জুন তাৰিখে এপিএছচিৰ পৰীক্ষা অনুষ্ঠিত কৰিবলৈ লোৱাত শংকাত ভুগিছে পৰীক্ষাৰ্থীসকল।
তেওঁলোকে অভিযোগ কৰি কয় যে যি সময়ত মানুহে অন্ন, বস্ত্ৰ আৰু বাসস্থানৰ অভাৱত আশ্রয় শিবিৰ, মথাউৰি আদিত জীৱন নিৰ্বাহ কৰিব লগা হৈছে, সেই সময়ত চৰকাৰে এপিএছচিৰ দৰে গুৰুত্বপূৰ্ণ পৰীক্ষা অনুষ্ঠিত কৰি বানাক্ৰান্ত অঞ্চলৰ প্ৰাৰ্থীসকলৰ লগত চৰম অন্যায় কৰিব খুজিছে। সেয়েহে সাম্প্ৰতিক পৰিস্থিতিৰ প্ৰতি লক্ষ্য ৰাখি ৰাজ্যৰ বান পৰিস্থিতি নিয়ন্ত্রণ নোহোৱা পর্যন্ত এই পৰীক্ষা স্থগিত ৰাখিবলৈ আহ্বান জনাইছে জাতীয় যুৱ বাহিনীয়ে। এনে সময়ত পৰীক্ষা অনুষ্ঠিত কৰিলে বানাক্ৰান্ত অঞ্চলৰ প্ৰাৰ্থীসকলৰ লগত অন্যায় কৰা হ’ব বুলিও অভিযোগ কৰে সংগঠনটোৱে।
বানাক্ৰান্ত অঞ্চলৰ যিসকল পৰীক্ষাৰ্থীৰ ঘৰ আজিও পানীৰ তলত আছে অথবা বানৰ সৈতে যুঁজি আছে সেই প্রার্থীজনে কেনেকৈ পঢ়িব, অথবা এপিএছচিৰ দৰে এটা পৰীক্ষাত অৱতীর্ণ হ’বলৈ মানসিকভাৱে কেনেকৈ সৱল হৈ থাকিব বুলিও প্রশ্ন উত্থাপন কৰে। এনে এক বিভীষিকাময় পৰিৱেশত পৰীক্ষা অনুষ্ঠিত কৰি প্ৰাৰ্থীসকলৰ জীৱন আৰু সপোনৰ লগত খেলা নকৰিবলৈ দাবী উত্থাপন কৰে জাতীয় যুৱ বাহিনীয়ে।
