শিৱসাগৰ বিশ্ববিদ্যালয়ৰ প্ৰাক্তন ছাত্ৰীৰ বিশেষ কৃতিত্ব। গুগলৰ (Google) গুৰুত্বপূৰ্ণ পদত প্ৰত্যাশা কলিতাৰ যোগদানে শিৱসাগৰবাসীৰ লগতে অসমবাসীক আনন্দিত কৰি তুলিছে। শিৱসাগৰ বিশ্ববিদ্যালয়ৰ পঞ্জীয়ক তথা ৰূদ্ৰসাগৰৰ নিবাসী ড° প্রফুল্ল চন্দ্ৰ কলিতা আৰু গৌৰীসাগৰ উচ্চতৰ মাধ্যমিক ইণ্ডাষ্ট্রিয়েল ইষ্টটিটিউটৰ বিজ্ঞান শিক্ষয়িত্রী বেবী কলিতাৰ জ্যেষ্ঠ কন্যা প্রত্যাশা কলিতাৰ সাফল্যই সমগ্ৰ শিৱসাগৰবাসীক উৎফুল্লিত কৰিছে।
প্রত্যাশাই বিশ্বৰ আগশাৰীৰ কোম্পানী গুগলত পাঁচটা পৰ্যায়ত অনুষ্ঠিত হোৱা সাক্ষাৎকাৰত সফলতাৰে উত্তীৰ্ণ হৈ আয়াৰলেণ্ডত SWE III (চফ্টৱেৰ ইঞ্জিনিয়াৰ) পদত নিযুক্তি পাবলৈ সক্ষম হৈছে। ইয়াৰ পূৰ্বে আয়াৰলেণ্ডত এমাজন কোম্পানীত আঢ়ৈ বছৰে SDE-I (চফ্টৱেৰ ডেভেলপমেণ্ট ইঞ্জিনিয়াৰ) পদত সফলতাৰে সেৱা আগবঢ়াইছিল।
গুগলত প্ৰত্যাশা কলিতাৰ নিযুক্তিয়ে পিতৃ-মাতৃ, ভগ্নী পৰিয়ালৰ লগতে সমগ্ৰ শিৱসাগৰ জিলাবাসীক আনন্দিত কৰিছে। প্ৰত্যাশা কলিতাই ৯ জুন তাৰিখে গুগলত ছফ্টৱেৰ ইঞ্জিনিয়াৰ হিচাপে যোগদান কৰিছে। আইআইটি খড়গপুৰৰ পৰা বিটেক সম্পূৰ্ণ কৰি এমাজনত আঢ়ৈ বছৰ ধৰি কৰ্মৰত আছিল।
হলিনেম স্কুলত শিক্ষা গ্ৰহণ কৰি হাইস্কুল শিক্ষান্ত পৰীক্ষাত উত্তীৰ্ণ হৈ প্ৰত্যাশা কলিতাই পূৰ্বৰ শিৱসাগৰ কলেজ আৰু বৰ্তমানৰ শিৱসাগৰ বিশ্ববিদ্যালয়ৰ পৰা উচ্চতৰ মাধ্যমিক চূড়ান্ত পৰীক্ষাত সফলতাৰে উত্তীৰ্ণ হৈছিল।
