দুটা সন্তানসহ স্বামীক এৰি গ’ল পত্নীয়ে। সেই বেজাৰতে ১৪ মহীয়া যমজ সন্তানক বহ খুৱাই আত্মহত্যা কৰিলে স্বামীয়ে।
উত্তৰ প্ৰদেশৰ বাদোহী জিলাৰ উগাপুৰ অঞ্চলত সোমবাৰে সংঘটিত হয় এই মৰ্মান্তিক ঘটনা।
জানিব পৰা মতে, আাত্মহত্যা কৰা ব্যক্তিগৰাকীৰ বয়স ২৭। নাম তেওঁৰ ওমপ্ৰকাশ যাদৱ।
আৰক্ষীয়ে তিনিজন লোকৰ মৃতদেহ উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰে।
আৰক্ষীৰ সূত্ৰ অনুসৰি ওমপ্ৰকাশৰ বিবাহ কেইবছৰমান পূৰ্বে সংগম যাদৱৰ সৈতে হৈছিল। তেওঁলোকৰ আশী আৰু প্ৰিয়াশী নামৰ ১৪ মহীয়া যমজ কন্যা সন্তান আছে। বৈবাহিক অস্থিৰতাৰ বাবে সংগমে স্বামী আৰু সন্তানক এৰি ঘৰৰ পৰা ওলাই যায়। এই ঘটনাত ওমপ্ৰকাশে ২১ নৱেম্বৰত থানাত পত্নী নিৰুদ্দেশ হোৱা সন্দৰ্ভতো এজাহাৰ দাখিল কৰে। অৱশ্যে পত্নী যোৱাৰ পিছত যুৱকজন মানসিকভাৱে ভাঙি পৰে।
পত্নী ঘৰলৈ উভতি নাহিলে ওমপ্ৰকাশ হতাশ হৈ পৰিল। ফলত তেওঁ নিজৰ দুই কন্যাক হত্যা কৰি আত্মহত্যা কৰে।
আৰক্ষীৰ সূত্ৰ অনুসৰি সোমবাৰে পুৱা যুৱকজনে গাখীৰত বিষ মিহলাই শিশুক দুটাক খুৱাইছিল। ইয়াৰ পিছত তেওঁ ঘৰতে আত্মহত্যাৰ চেষ্টা কৰে। কিন্তু বিফল হোৱাৰ পিছত পুৱা প্ৰায় ৭ বজাত ঘৰৰ পৰা প্ৰায় ৫০০ মিটাৰ দূৰত আত্মহত্যা কৰে । স্থানীয় ৰাইজে গছত ওলমি থকা যুৱকজনৰ মৃতদেহ দেখি আৰক্ষীক খবৰ দিয়ে । তেতিয়া আৰক্ষী আহি মৃতদেহ উদ্ধাৰ কৰে।
এই ঘটনা সন্দৰ্ভত আৰক্ষী বিষয়া অজিত কুমাৰ শ্ৰীবাস্তৱে কয়, “প্ৰাথমিক তদন্তত আমি ধৰি লৈছোঁ যে যুৱকজন পত্নী গুচি যোৱাৰ বাবে মানসিকভাৱে ভাঙি পৰিছিল। যাৰ বাবেই তেওঁ এই অপৰাধ সংঘটিত কৰিছিল।
