সুশান্ত সিং ৰাজপুতৰ মৃত্যুৰ তদন্তুত নতুনকৈ পোহৰলৈ আহিছে আৰু এক ৰহস্য। ফৰেনছিক ৰিপ’ৰ্টত পোৱা তথ্যক কেন্দ্ৰ কৰি সৃষ্টি হৈছে চাঞ্চল্যৰ।
জানিব পৰা মতে, মৰণোত্তৰ পৰীক্ষা কৰাৰ ১২ঘন্টাৰ পৰা ১৫ঘন্টা পূৰ্বে সুশান্ত সিং ৰাজপুতৰ মৃত্যু হৈছিল।
যোৱা ১৪ জুনত মুম্বাইৰ ফ্লেটৰ পৰা উদ্ধাৰ কৰা হৈছিল সুশান্তৰ ওলমি থকা মৃতদেহ। মৃতদেহ উদ্ধাৰৰ পাছতে মৰণোত্তৰ পৰীক্ষাৰ বাবে মুম্বাইৰ কুপাৰ হাস্পাতললৈ প্ৰেৰণ কৰা হৈছিল।
বাতৰি অনুসৰি, ফৰেনছিক ৰিপ’ৰ্টত প্ৰকাশ পাইছে যে সুশান্তৰ মৃত্যুৰ ১২ৰ পৰা ১৫ঘন্টা পাছত তেওঁৰ মৃতদেহৰ মৰণোত্তৰ পৰীক্ষা কৰা হৈছিল।
আনহাতে, ৰিপ’ৰ্টত কোৱা হৈছে যে যিখন কাপোৰেৰে পাঁচ লগোৱা হৈছিল সেইখন কমেও ২০০ কিলোগ্ৰাম ভৰ সহিব পৰাকৈ মজবুত।
সুশান্তৰ পিতৃৰ অধিবক্তা বিকাশ সিঙে পূৰ্বে অভিযোগ কৰিছিল যে মুম্বাই আৰক্ষীয়ে চলোৱা মৰণোত্তৰ পৰীক্ষাত সময়ৰ কোনো উল্লেখ নাই। অধিবক্তাগৰাকীয়ে সেই বিষয়ে প্ৰশ্ন তুলিছিল।
ইপিনে, বিভিন্ন মহলত প্ৰশ্ন উঠিছে যে সুশান্তৰ প্ৰাক্তন মেনেজাৰ দিশা ছালিয়ানৰ মৃত্যুৰ তিনিদিনত পাছত তেওঁৰ মৃতদেহৰ মৰণোত্তৰ পৰীক্ষা কৰা হৈছিল। কিন্তু সুশান্তৰ ক্ষেত্ৰত ইমান খৰধৰ কৰা হ’ল কিয়?
শনিবাৰে চিবিআইয়ে সুশান্তৰ মৃত্যুৰ গোচৰত তেওঁৰ বন্ধু তথা ক্ৰিয়েটিভ মেনেজাৰ সিদ্ধাৰ্থ পিথানিক জেৰা কৰে।
তেওঁৰ লগতে সুশান্তৰ ৰান্ধনি নীৰজকো জেৰা কৰা হয়। দুয়োজনৰ বক্তৱ্যৰ মাজত চিবিআইয়ে পাৰ্থক্য ধৰা পেলাইছে বুলি জানিব পৰা গৈছে।
গোটেই ঘটনাটোৰ বিতং তদন্তৰ বাবে চিবিআইয়ে ইতিমধ্যে নিজৰ পৰিকল্পনা অনুসৰি আগবাঢ়িছে।
