অসমীয়া আধুনিক কবিতাৰ এগৰাকী পুৰোধা কবি জ্ঞান পূজাৰীৰ কবিতা মানেই এক দৰ্শন আৰু ৰুঢ় বাস্তৱৰ জীৱন্ত ছবি। গ্ৰাম সমাজ চেতনা আৰু মহানাগৰিক জীৱন যন্ত্ৰণাৰ লগতে এক দায়িত্বশীল ৰাজনৈতিক বক্তব্যৰে মহীয়ান কবিগৰাকীৰ কবিতা।
সাহিত্য অকাডেমী বঁটা প্ৰাপক জ্ঞান পূজাৰীৰ কবিতাৰ বিৱৰ্তন অনুধাৱন কৰিলেই আধুনিক অসমীয়া কবিতাৰ বিৱৰ্তনৰ গতি-প্রকৃতি নিৰ্ণয় কৰিব পাৰি।
এই নিৰ্ণায়ক কবিতাসমূহকে তথা কবি জ্ঞান পূজাৰীৰ শ্ৰেষ্ঠ কবিতাসমূহৰ নিৰ্বাচন আৰু সম্পাদনাৰ বৃহৎ আয়োজন, বিস্তৃত পাতনিৰে কবি-প্ৰৱন্ধকাৰ, লোক-কবিতাৰ গৱেষক, ভাষা-আলোচক তথা অভিধানকাৰ, চিত্ৰকৰ ধ্ৰুৱজ্যোতি দাসৰ সম্পাদিত-সংকলিত ‘তাঁতশালৰ সপোন : জ্ঞান পূজাৰীৰ নিৰ্বাচিত কবিতা’ শীৰ্ষক গ্ৰন্থখন উন্মোচন কৰা হয়।
আজি গ্ৰন্থমেলাৰ থলিত গ্ৰন্থখন উন্মোচন কৰে বিশিষ্ট লেখক, সম্পাদক নিত্য বৰা আৰু বিশিষ্ট লেখক-সমালোচক প্রভাত বৰাই।
আধুনিক কাব্যৰ কাৰিকৰী থাকিলেও তেওঁৰ কবিসত্তাৰ শিপা স্বদেশৰ মাটিত বহু গভীৰলৈ পোত খাই আছে। সেয়ে আধুনিক কাব্যত সুলভ নিৰ্বাসিত দেশান্তৰী সত্তাৰ বন্ধ্যা বেদনাৰ ঠাইত তেওঁৰ কবিতাত ফুটি উঠিছে সাম্প্ৰতিক কালৰ বিপন্ন, বিধ্বস্ত স্বদেশৰ আৰ্তি।
এই আবহাৱাৰেই সংকলিত হৈছে এই গ্ৰন্থখন। ই ধ্ৰুৱজ্যোতি দাসৰ এক মূল্যবান কৰ্মৰ নিদৰ্শন ৷ উল্লেখ্য যে ‘তাঁতশালৰ সপোন’ত ধ্ৰুৱজ্যোতি দাসৰ সুদীৰ্ঘ পাতনিত বিধৃত কৰা হৈছে জ্ঞান – পূজাৰীৰ কবিতাৰ কিছুমান নতুন কথা – যিটো অসমীয়া কাব্যজগতৰ বাবেই লক্ষ্যণীয় আৰু আশ্চৰ্যময়।
আজিৰ উন্মোচনী অনুষ্ঠানত বহুকেইগৰাকী কবি-সাহিত্যিক তথা বিশেষ ব্যক্তি উপস্থিত থাকে।
