ভাৰতীয় মহাকাশ গৱেষণা সংস্থা (ISRO) ক অবিৰতভাৱে মহাকাশৰ পৰা যোৱা ১২ বছৰে তথ্য প্ৰদান কৰি আহিছিল মেঘ ট্ৰপিকছ–১ (এম টি–১) নামৰ কৃত্ৰিম উপগ্ৰহটোৱে। কিন্তু মহাকাশৰ পৰা পৃথিৱীক প্ৰদক্ষিণ কৰি ১২ বছৰে তথ্য প্ৰদান কৰি অহা এই কৃত্ৰিম উপগ্ৰহটোক মঙলবাৰে নমাই অনা হ’ল পৃথিৱীৰ বায়ুমণ্ডললৈ। তাৰপিছতেই ধ্বংস কৰি পেলোৱা হ’ল এই উপগ্ৰহটোক।
কিন্তু কিয়? অবিৰতভাৱে মহাকাশৰ পৰা যোৱা ১২ বছৰে তথ্য প্ৰদান কৰি নিজৰ কাৰ্যক্ষমতা হেৰুৱাই পেলাইছিল এই কৃত্ৰিক উপগ্ৰহটোৱে। এক কথাত ক’বলৈ গ’লে ম্যাদ উকলিছিল এই যন্ত্ৰটোৰ। গতিকে তথ্য প্ৰদান কৰাত সমস্যাৰ সন্মুখীন হৈছিল উপগ্ৰহটোৱে। সেয়ে ISRO এ মহাকাশৰ পৰা নমাই আনিলে মেঘ ট্ৰপিকছ–১ নামৰ কৃত্ৰিম উপগ্ৰহটোক।
ইয়াৰ পিছত আকাশত জ্বলি ছাই হৈ পৰিছিল মেঘ ট্ৰপিকছ–১। ইছৰোৰ সূত্ৰ অনুসৰি বংগ উপসাগৰ আৰু প্ৰশান্ত মহাসাগৰৰ ওপৰত দুটা পৰ্যায়ত ধ্বংস কৰা হৈছিল কৃত্ৰিম উপগ্ৰহটোক।
উল্লেখ্য যে, ২০১১ চনৰ অক্টোবৰ মাহত ISRO আৰু ফ্ৰান্সৰ মহাকাশ সংস্থা চিএনইএছৰ দ্বাৰা কৃত্ৰিম উপগ্ৰহ এম টি–১ উৎক্ষেপণ কৰা হৈছিল। এই কৃত্ৰিম উপগ্ৰহটোৱে এক দশকৰো অধিক সময় ধৰি গ্রীষ্মমণ্ডলীয় বতৰ আৰু জলবায়ু পৰিৱৰ্তন সফলভাৱে নিৰীক্ষণ কৰি আহিছিল। কিন্তু কাৰ্যক্ষমতা হেৰুৱাৰ বাবে ৰাষ্ট্ৰসংঘৰ আন্তঃসংস্থা মহাকাশ ধ্বংসাৱশেষ সমন্বয় সমিতিৰ (UNIADC) নিৰ্দেশনা অনুসৰণ কৰি ইয়াক ধ্বংস কৰি দিলে ভাৰতীয় মহাকাশ গৱেষণা সংস্থাই।
