আগন্তুক লোকসভা নিৰ্বাচনলৈ দলীয় প্ৰাৰ্থীৰ নাম ঘোষণা কৰিলে য়ুনাইটেড পিপ’লছ পাৰ্টি লিবাৰেল চমুকৈ য়ু পি পি এলে। দলটোৱে কোকৰাঝাৰ আৰু মঙলদৈ লোকসভা সমষ্টিৰ পৰা প্ৰতিদ্বন্দ্বিতা কৰিব। বৃহস্পতিবাৰে কাঁজল গাঁওত থকা দলীয় কাৰ্য্যালয়ত অনুষ্ঠিত বৈঠকৰ পাছত এই সিদ্ধান্ত গ্ৰহণ কৰা হয়।
য়ু পি পি এলৰ নেতৃত্বত থকা প্ৰাক্তন ৰাজ্যসভাৰ সাংসদ ঔৰ্খাও গৌৰাং ব্ৰহ্মই নিজে কোকৰাঝাৰ সমষ্টিৰ পৰা বি পি এফৰ প্ৰাৰ্থী প্ৰমীলা ৰাণী ব্ৰহ্মৰ বিপৰীতে প্ৰতিদ্বন্দ্বিতা কৰিব।
আনহাতে, মঙলদৈ সমষ্টিৰ পৰা প্ৰতিদ্বন্দ্বিতা কৰিব আবছুৰ প্ৰাক্তন উপ সভাপতি প্ৰদীপ দৈমাৰীয়ে।
উল্লেখযোগ্য যে, কোকৰাঝাৰ সমষ্টিত এপ্ৰিলৰ ২৩ তাৰিখে ভোটগ্ৰহণ অনুষ্ঠিত হোৱাৰ বিপৰীতে মঙলদৈ সমষ্টিত ভোটগ্ৰহণ অনুষ্ঠিত হ’ব ১৮ এপ্ৰিলত।
দলীয় বৈঠকৰ অন্তত সাংবাদিকৰে সৈতে হোৱা মুখামুখিত ঔৰ্খাও ব্ৰহ্মই কয় যে কোকৰাঝাৰ সমষ্টিৰ পৰা প্ৰতিদ্বন্দ্বিতা কৰিব লগীয়া অন্য দুজন প্ৰাৰ্থী প্ৰমীলা ৰাণী ব্ৰহ্ম আৰু নৱ শৰণীয়া যথেষ্ট শক্তিশালী যদিও য়ু পি পি এলেও সৰ্বশক্তিৰে নিৰ্বাচনত অৱতীৰ্ণ হ’ব।
