আকৌ নাক-কাণ কটা গ’ল শিক্ষামন্ত্ৰী ৰণোজ পেগুৰ। নাক-কাণ কটা গ’ল অসম উচ্চতৰ মাধ্যমিক শিক্ষা সংসদৰ। এইবাৰ নকল কৰিবলৈ নিদিয়াৰ বাবে ধুবুৰীত প্ৰতিবাদত নামিল অসম উচ্চতৰ মাধ্যমিক শিক্ষা সংসদৰ অধীনস্থ অসম স্টেট অ’পেন স্কুলৰ উচ্চতৰ মাধ্যমিকৰ চূড়ান্ত পৰীক্ষাৰ একাংশ শিক্ষাৰ্থী।
জানিব পৰা মতে, ধুবুৰী ছিনিয়ৰ উচ্চতৰ মাধ্যমিক বিদ্যালয়, আলমগঞ্জৰ ৰঙামাটি ছিনিয়ৰ উচ্চতৰ মাধ্যমিক বিদ্যালয়, পশ্চিম ধুবুৰী ছিনিয়ৰ উচ্চতৰ মাধ্যমিক বিদ্যালয়, আইৰকাটা ছিনিয়ৰ উচ্চতৰ মাধ্যমিক বিদ্যালয় আৰু ৰূপসীৰ দাওভাংগী ছিনিয়ৰ উচ্চতৰ মাধ্যমিক বিদ্যালয়ৰ মুঠ ২৩১ গৰাকী পৰীক্ষাৰ্থীয়ে ধুবুৰীৰ চৰকাৰী ছোৱালী উচ্চতৰ মাধ্যমিক বিদ্যালয়ৰ পৰীক্ষা কেন্দ্ৰত পৰীক্ষা দিয়াৰ বাবে নাম পঞ্জীয়ন কৰিছিল।
বৃহস্পতিবাৰে এই সকল শিক্ষাৰ্থীয়ে পৰীক্ষা কেন্দ্ৰটোত ইংৰাজী বিভাগৰ পৰীক্ষা দিছিল যদিও শুকুৰবাৰে অনুষ্ঠিত অসমীয়া বিষয়ৰ পৰীক্ষা দিবলৈ নাহিলে আধাতকৈও অধিক ছাত্ৰ-ছাত্ৰী। মাত্ৰ ৯০ গৰাকী প্ৰাৰ্থীহে বহিল অসমীয়া বিষয়ৰ পৰীক্ষাত।
অভিযোগ অনুসৰি, নকল কৰাৰ সুবিধা দিয়াৰ প্ৰতিশ্ৰুতিত শিক্ষাৰ্থীৰ পৰা ধনৰ টোপোলা গ্ৰহণ কৰিছিল একাংশ শিক্ষকে। কিন্তু ইংৰাজী পৰীক্ষাৰ দিনা নকল কৰাৰ সুযোগ দিব নোৱাৰিলে ধন লোৱা ধুৰন্ধৰ শিক্ষকসকলে। পৰীক্ষা কেন্দ্ৰলৈ নিবলৈ দিয়া নহ’ল মোবাইল ফোন আৰু কিতাপ। যাৰ বাবে ধনৰ বিনিময়ত পৰীক্ষা দিবলৈ যোৱা শিক্ষাৰ্থীসকল ক্ষুব্ধ হৈ পৰে।
ক্ষুব্ধ হৈ শতাধিক পৰীক্ষার্থীয়ে অসম উচ্চতৰ মাধ্যমিক শিক্ষা সংসদৰ অসম ষ্টেট অ’পেন স্কুলৰ উচ্চতৰ মাধ্যমিকৰ চূড়ান্ত বৰ্ষৰ পৰীক্ষা বৰ্জন কৰে।
অভিযোগ অনুসৰি নকলৰ সুবিধা কৰি দিয়াৰ প্ৰতিশ্ৰুতি দি প্ৰতি গৰাকী শিক্ষাৰ্থীৰ পৰা ৫ ৰ পৰা ১৫ হেজাৰকৈ টকা লৈছিল একাংশ শিক্ষকে। এই ঘটনাক কেন্দ্ৰ কৰি পৰীক্ষাৰ্থী সকলে এক হূলস্থূলীয়া তথা অনাহূত পৰিৱেশৰ সৃষ্টি কৰে।
