আজি গোলাঘাট নগৰৰ তিনিজন কলেজীয়া ছাত্রই এটা আঘাতপ্রাপ্ত বান্দৰ উদ্ধাৰ কৰি গোলাঘাট নগৰৰ পশু চিকিৎসালয় কৰ্তৃপক্ষক চমজাই দি মানৱতাৰ নিৰ্দশন দাঙি ধৰে।
প্রাপ্ত তথ্য অনুসৰি গোলাঘাট বাণিজ্য মহাবিদ্যালয়ৰ তিনি ছাত্ৰ ভবেশ হাজৰিকা,অবিনাশ ফুকন আৰু ফুল কুমাৰ তামাং নামৰ ছাত্ৰ তিনিজনে আজি কলেজলৈ আহি থকা অৱস্থাত নগৰৰ বাটা পইণ্টত মানুহৰ জুম প্ৰত্যক্ষ কৰে।
উৎসুক হৈ তেওঁলোকো উক্ত স্থানলৈ যোৱাত মানুহৰ মাজত এটা আঘাlপ্রাপ্ত অসহায় বান্দৰ দেখিবলৈ পায়। লগে লগে তিনি বন্ধুৱে কেইটামান কল আৰু বিস্কুট দি বান্দৰটো নিজৰ আয়ত্বলৈ আনে আৰু প্ৰয়োজনীয় চিকিৎসা প্ৰদানৰ বাবে পশু চিকিৎসালয়ত চমজাই দিয়ে।
লক্ষণীয় যে উক্ত ছাত্ৰ কেইজনে বন্যপ্ৰাণীৰ সুৰক্ষাৰ বাবে এনেদৰে আগ্ৰহ প্ৰকাশৰ মূলতে দেওবাৰে সতী সাধনী কলাক্ষেত্ৰত সম্পন্ন হোৱা বন্যপ্ৰাণীৰ হত্যা আৰু ইয়াৰ বিশ্বজোৰা ব্যৱসায়ৰ বিষয়ে অনুষ্ঠিত হোৱা কৰ্মশালা বুলি উল্লেখ কৰে।
উক্ত কৰ্মশালা সন্দৰ্ভত সংবাদ মাধ্যমৰ জৰিয়তে আমাৰ চৌপাশৰ প্ৰকৃতি আৰু বন্যপ্ৰাণীসমূহক সুৰক্ষা দিয়াতো প্ৰতিজন নাগৰিকৰ মৌলিক কৰ্তব্য বুলি দিয়া বাৰ্তাই তেওঁলোকক অনুপ্ৰাণিত কৰা বুলি মন্তব্য কৰিছে।
