কানাডাত চলন্ত গাড়ীৰ চকা খুলি গৈ ভয়ংকৰ দুৰ্ঘটনা; মৃত্যু ৩ ভাৰতীয় শিক্ষাৰ্থীৰ

কানাডাৰ ঘাইপথত চলন্ত অৱস্থাত গাড়ীৰ চকা খুলি গৈ সংঘটিত হয় ভয়ংকৰ দুৰ্ঘটনা। এই দুৰ্ঘটনাত পঞ্জাৱৰ ৩ গৰাকী শিক্ষাৰ্থীৰ মৃত্যু ঘটে। শনিবাৰে নিউ ব্ৰান্সৱিকৰ মিল ক’ভ অঞ্চলৰ ২ নং ঘাইপথত সংঘটিত হয় এই দুৰ্ঘটনা। গুৰুতৰভাৱে আহত হোৱাৰ বাবে থিতাতে মৃত্যু হয় তিনিজনৰ।

আৰক্ষী সূত্ৰৰ পৰা জানিব পৰা মতে, কানাডাত সংঘটিত দুৰ্ঘটনাটোত হৰমন চোমাল (২৩) আৰু নভজিত চোমাল (১৯)ৰ মৃত্যু হয়। দুয়োজনেই লুধিয়ানাৰ মালাউড গাঁৱৰ বাসিন্দা। কেইমাহমান আগতে তেওঁলোক পঢ়া-শুনাৰ বাবে কানাডালৈ গৈছিল। এই দুৰ্ঘটনাত লগতে ৰসমদীপ কৌৰ (২৩) নামৰ এগৰাকী ছাত্ৰীৰো মৃত্যু হয়। ৰসমদীপ পঞ্জাৱৰ সাংগ্ৰুৰ জিলাৰ বাসিন্দা।

লগতে পঢ়কঃ ঝাৰখণ্ডত মুম্বাইমুখী ৰে’লৰ ১৮টা ডবা লাইনচ্যুত, দুজনৰ মৃত্যু, কমেও ২০জন আহত

কানাডাৰ আৰক্ষীয়ে জনোৱা মতে, ২৭ জুলাইৰ নিশা ৯:৩৫ বজাত মিল ক’ভৰ ২ নং ঘাইপথত সংঘটিত হয় এই দুৰ্ঘটনা। তীব্ৰবেগী গাড়ীৰ এটা চকা হঠাতে খুলি যায়। ফলত নিয়ন্ত্ৰণ হেৰুৱায় চালকে। গাড়ীখনে কেইবাবাৰো ৰাস্তাত পাল্টা খায়। তিনিওজন শিক্ষাৰ্থী পথৰ ওপৰত ছিটিকি পৰে। গুৰুতৰভাৱে আঘাতপ্ৰাপ্ত হোৱাৰ ফলত থিতাতে মৃত্যু হয় তিনিওজনৰে।

ইপিনে, চালকজন আহত যদিও ৰক্ষা পৰে। তেওঁক স্থানীয় চিকিৎসালয়ত ভৰ্তি কৰোৱা হয়। ইতিমধ্যে তিনিওগৰাকী ভাৰতীয় শিক্ষাৰ্থীৰ মৃতদেহ ঘূৰাই অনাৰ প্ৰক্ৰিয়া আৰম্ভ হৈছে।

লগতে পঢ়কঃ ৰাহুলে গান্ধীয়ে সংসদত ছবি দেখুৱাই দিলে মন্তব্য, মূৰে-কপালে হাত দিলে সীতাৰমনে! ঘটনাটো কি?

উল্লেখ্য যে এক সমীক্ষাত প্ৰকাশ পোৱা মতে বিগত পাঁচ বছৰত বিদেশত অধ্যয়নৰ বাবে যোৱা ৬৩৩ গৰাকী ভাৰতীয় শিক্ষাৰ্থীৰ মৃত্যু হৈছে। কানাডাৰ এই ঘটনাৰ ফলত মৃতকৰ সংখ্যা আৰু অধিক বৃদ্ধি পালে।