নামনি সোৱণশিৰি জলবিদ্যুৎ প্ৰকল্পৰ সুৰক্ষা সম্পৰ্কীয় দিশসমূহ চালি-জাৰি চোৱাৰ বাবে কেন্দ্ৰীয় চৰকাৰে গঠন কৰা তিনিজনীয়া বিশেষজ্ঞ কমিটীখন বাহাল ৰখাৰ সপক্ষে ৰায় দিছে ৰাষ্ট্ৰীয় সেউজ ন্যায়াধীকৰণে।
উক্ত কমিটিখনৰ নিৰপেক্ষতাক লৈ প্ৰশ্ন উত্থাপন কৰি আদালতৰ কাষ চপা অধিবক্তা তথা প্ৰাক্তন ছাত্ৰ নেতা তুলাৰাম গগৈৰ আৱেদনখন শুকুৰবাৰে ৰাষ্ট্ৰীয় সেউজ ন্যায়াধিকৰণে খাৰিজ কৰিছে।
উল্লেখযোগ্য যে পূৰ্বে আছাম পাব্লিক ৱৰ্কছে বিশেষজ্ঞ কমিটীখনৰ নিৰপেক্ষতাক লৈ প্ৰশ্ন তুলি দাখিল কৰা আৱেদনখনো সেউজ ন্যায়াধিকৰণে নাকচ কৰিছিল। সেউজ ন্যায়াধিকৰণৰ এনে স্থিতিয়ে নামনি সোৱণশিৰি নদীবান্ধ প্ৰকল্পৰ নিৰ্মাণৰ কাম পুনৰ আৰম্ভ হোৱাৰ কথাকে স্পষ্ট কৰি তুলিছে।
শুকুৰবাৰে সেউজ ন্যায়াধিকৰণৰ মুখ্য ন্যায়াধীশ আদৰ্শ কুমাৰ গোৱেল, ন্যায়াধীশ পি ৱাংৰি, কে ৰামাকৃষ্ণণ আৰু বিশেষজ্ঞ সদস্য নাগিন নন্দাৰে গঠিত খণ্ড বিচাৰপীঠখনে জলবিদ্যুৎ প্ৰকল্পটোৰ সুৰক্ষা সম্পৰ্কীয় দিশসমূহ চালি-জাৰি চোৱাৰ বাবে কেন্দ্ৰীয় চৰকাৰে গঠন কৰি দিয়া তিনিজনীয়া কমিটীখন বাহাল ৰখাৰ সিদ্ধান্ত ঘোষণা কৰে।
পূৰ্বতে যুক্তিযুক্ততা নথকাৰ বাবেই এই সন্দৰ্ভত আন এখন আৱেদন খাৰিজ কৰাৰ কথা উল্লেখ কৰি বিচাৰপীঠখনে বিষয়টোৰ সন্দৰ্ভত পুনৰ এখন আৱেদনৰ শুনানি গ্ৰহণৰ প্ৰয়োজনীয়তা অস্বীকাৰ কৰে।
আনহাতে, উক্ত শুনানিত উপস্থিত থকা সদৌ অসম ছাত্ৰ সন্থাৰ সভাপতি দীপাংক কুমাৰ নাথে ন্যায়াধীকৰণৰ এই ৰায়ত অসন্তুষ্টি ব্যক্ত কৰিছে। সংবাদমাধ্যমৰ আগত নাথে উচ্চতম ন্যায়ালয়ৰ কাষ চপাৰ কথা সদৰী কৰে।
