হাইলাকান্দিত তিনিজন সন্দেহযুক্ত বাংলাদেশী আটক
সমগ্ৰ ৰাজ্যতে এন আৰ চিক লৈ ব্যাপক চৰ্চা অব্যাহত থকাৰ মাজতে দেওবাৰে বৰাক উপত্যকাৰ হাইলাকান্দিৰ লালা বাজাৰৰ পৰা হাইলাকান্দি আৰক্ষীয়ে তিনিজন সন্দেহযুক্ত বাংলাদেশী নাগৰিকক আটক কৰে।
জানিব পৰা মতে হাইলাকান্দি আৰক্ষীয়ে জিলাখনৰ বিভিন্ন গাঁৱসমূহত নতুন মানুহৰ প্ৰৱেশ সন্দৰ্ভত সন্ধান চলাইছিল।
দেওবাৰে সন্ধিয়া বিতং অনুসন্ধানৰ মাজতে লালা বাজাৰ আৰক্ষী থানা অঞ্চলৰ অধীনৰ এখন ভিতৰুৱা গাঁৱৰ পৰা তিনিজন লোকক আটক কৰা হয়। লোক কেইজনক বাংলাদেশী নাগৰিক বুলি সন্দেহ কৰা হৈছে।
এগৰাকী জ্যেষ্ঠ আৰক্ষী বিষয়াই জনোৱা মতে গ্ৰেপ্তাৰ কৰা লোক কেইজনক মহম্মদ হাফিজ মোল্লা, আয়াৰ আলী আৰু মহম্মদ বাবলু মোল্লা বুলি চিনাক্ত কৰা হৈছে।
তেওঁলোকক বাংলাদেশৰ গোপালগঞ্জ জিলাৰ ভুলবৰিয়া গাঁৱৰ নাগৰিক বুলি সন্দেহ কৰা হৈছে।
ৰাষ্ট্ৰীয় নাগৰিকপঞ্জীৰ কাম সম্পূৰ্ণ কৰাৰ পথত আহি এক স্পৰ্শকাতৰ পৰ্যায়ত উপস্থিত হোৱাৰ সময়তে তিনিজনকৈ সন্দেহজনক বাংলাদেশী নাগৰিকক আটক কৰাটো আৰক্ষীৰ এক বৃহৎ সফলতা হিচাপে বিবেচিত হৈছে।
ইয়াৰ মাজতে গোটেই বিষয়টো সন্দৰ্ভত অনুসন্ধান অব্যাহত আছে। আৰক্ষীয়ে জিলাখনৰ ভিতৰুৱা গাঁৱসমূহত আশ্ৰয় লৈ থাকিব পৰা সম্ভাৱ্য সন্দেহযুক্ত বাংলাদেশী নাগৰিকৰ সন্ধানত তালাচী অভিযান ক্ষিপ্ৰতৰ কৰি তুলিছে।