বঙাইগাঁৱৰ বন্ধ হৈ থকা প্ৰশান্তি ল’জত কি কৰিছিল তিনি চোৰে?

বঙাইগাঁও চহৰৰ উত্তৰ বঙাইগাঁৱৰ প্ৰশান্তি ল’জত চুৰি কৰিবলৈ গৈ বুধবাৰে আৰক্ষীৰ হাতত তিনিজন চোৰ আটক হয় ৷

ধৃত তিনি চোৰ তিনিজন ক্ৰমে কলগাছিয়াৰ কাটাখালিৰ ৰহিম খান (১৮) , যোগীঘোপাৰ খেতাপাৰাৰ আনোৱাৰ হুছেইন (১৮) আৰু উত্তৰ বঙাইগাঁও শালবাগানৰ বিশাল চন্দ (১৯) বুলি জানিব পৰা গৈছে ৷

প্ৰাপ্ত বাতৰি মতে বুধবাৰে পুৱা দহ মান বজাত  চোৰ তিনিজনে পৰিত্যক্ত অৱস্থাত থকা প্ৰশন্তি ল’জৰ ভিতৰত প্ৰৱেশ কৰা দেখি একাংশই আৰক্ষীক খবৰ দিয়ে ৷

ইয়াৰ পিছ মুহুৰ্ততে আৰক্ষীৰ দল উপস্থিত হৈ ল’জৰ ভিতৰত হাতে-লোটে তিনিওকে কৰায়ত্ত কৰে ৷

তিনিওৰে পৰা ল’জৰ ভিতৰত থকা চুৰি কৰা সা -সামগ্ৰী জব্দ কৰে ৷ উল্লেখ্য যে দীৰ্ঘ দিনে ল’জটো বন্ধ হৈ থকাৰ সুযোগ গ্ৰহণ কৰি চোৰৰ দলটোতে সা -সামগ্ৰী চুৰি কৰি নিয়াৰ চেষ্টা চলায় ৷

ইতিমধ্যে চোৰে প্ৰশান্ত ল’জৰ ভিতৰৰ বহু সা- সামগ্ৰী চুৰি কৰি নিছে ৷

ইপিনে  উত্তৰ বঙাইগাঁৱৰ বজাৰ ইণ্ডিয়াৰ সমীপত ই ৰিক্সাৰে আহি থকা মহিলাৰ ডিঙিৰ পৰা  দুৰ্বৃত্তই সোণৰ চেইন কাঢ়ি নিয়া আন এক ঘটনা সংঘটিত হয় ৷

দিনৰ প্ৰায় দুই মান বজাত বাইকত অহা দুজনীয়া দলে খাৰিজা দোলাইগাঁও – পালপাৰাৰ বাসিন্দা মিষ্টি ঘোষ নামৰ মহিলাগৰাকীৰ ডিঙিৰ পৰা চেইন লৈ উধাও হয় ৷

কিন্তু ঘটনাৰ পিছ মুহুৰ্ততে আৰক্ষী তৎপৰ হৈ পৰে আৰু জিলা আৰক্ষী অধীক্ষক স্বপ্ননীল ডেকাই জিলাখনৰ সকলো আৰক্ষীক সতৰ্ক কৰি দিয়ে ৷

চিচি টিভিৰ ফুটেজ সংগ্ৰহ কৰি দুই দুৰ্বৃত্তৰ সন্ধানত আৰক্ষী নামি পৰে আৰু উত্তৰ শালমাৰাত সন্দেহজনক দুই যুৱকক বাইকসহ আটক কৰে ৷

কলগাছিয়াৰ টাৰাকান্দিৰ আশ্ৰাফুল ইছলাম আৰু ৰকিবুল ইছলাম নামৰ যুৱক দুজনক আৰক্ষীয়ে বঙাইগাঁৱলৈ আনি সোধ পোছ অব্যাহত ৰাখিছে ৷