আজি ৯ অক্টোবৰৰ দিনৰ প্ৰায় ১১-০০ মান বজাত টিহু নগৰৰ সৰ্থেবাৰী পথৰ চ’কত, কলিতা ষ্টোৰ নামৰ কাপোৰ দোকানৰ সন্মুখত সদৌ অসম ছাত্ৰ সন্থাৰ টিহু গোটৰ সদস্যসকলে বাবা ৰামদেৱৰ ‘পতঞ্জলি’ ব্ৰে্ণ্ডৰ বিৰুদ্ধে তীব্ৰ প্ৰতিবাদ সাব্যস্ত কৰে।
উল্লেখ্য যে পতঞ্জলিৰ যোগ প্ৰশিক্ষক সতীনাথ বৰালে অসমৰ ভেৰুৱা গাঁৱত এটা যোগ শিবিৰত অংশগ্ৰহণ কৰি মহাপুৰুষ দুজনাৰ বিৰুদ্ধে অপমানসূচক মন্তব্য প্ৰদান কৰাৰ পৰৱৰ্তী সময়ত সমগ্ৰ অসমতেই ইয়াৰ তীব্ৰ প্ৰতিবাদ হৈ আহিছে।
অসমৰ বিভিন্ন স্থানত প্ৰতিবাদীসকলে পতঞ্জলিৰ বিপণিসমূহ বন্ধ কৰি দিছে আৰু ৰামদেৱে নিজেই আহি ক্ষমা খোজাৰ দাবী জনাইছে বিভিন্ন দল সংগঠনে।
আজি টিহু নগৰতো পতঞ্জলিৰ যোগ প্ৰশিক্ষকগৰাকীৰ অসমৰ গুৰুদুজনাৰ প্ৰতি প্ৰদৰ্শন কৰা অভব্য আচৰণৰ প্ৰতিবাদত প্ৰতিবাদকাৰীসকলে ‘‘সদৌ অসম ছাত্ৰ সন্থা জিন্দাবাদ, উই ৱাণ্ট জাষ্টিছ, ৰামদেৱ মুৰ্দাবাদ, অসম চৰকাৰ হায় হায়, সতীনাথ বৰাৰলক অতি শীঘ্ৰে গ্ৰেপ্তাৰ কৰক, ৰামদেৱ গ’বেক পতঞ্জলি নিপাত যাওক, অসমত পতঞ্জলি নচলিব’’ আদি ধ্বনি দিয়ে আৰু টিহুৰ ৰাজপথত ৰামদেৱৰ জুমুঠি দাহন কৰে।
উক্ত প্ৰতিবাদী সভাত আছুৰ টিহু গোটৰ সভাপতি হিতেশ বৰ্মন, সভাপতি ভাস্কৰ বৰ্মনে নেতৃত্ব লোৱা এই প্ৰতিবাদী কাৰ্যসূচীত আজিৰে পৰা বৃহত্তৰ টিহু এলেকাত পতঞ্জলিৰ বিপণিসমূহ বন্ধ কৰাৰ লগতে সামগ্ৰীসমূহ বয়কট কৰাৰো সিদ্ধান্ত গ্ৰহণ কৰা হয়।
