টাইটানিক জাহাজৰ ধ্বংসাৱশেষ চাবলৈ পৰ্যটক কঢ়িয়াই নিয়া চাবমেৰিন ‘টাইটান’ আটলাণ্টিক মহাসাগৰত আৰু বিচাৰি পোৱা নাই।
জানিব পৰা মতে, তাত পাঁচজন মানুহ আছিল। পাইলটৰ বাহিৰেও চাবমেৰিনত চাৰিজন পৰ্যটক আছিল। ২৪ ঘণ্টাৰো অধিক পাৰ হৈ গ’ল৷ আটলাণ্টিকত পূৰ্ণগতিত ইয়াৰ সন্ধান চলি আছে।
উল্লেখ্য যে ‘টাইটান’ৰ যাত্ৰা আৰম্ভ হৈছিল নিউফাউণ্ডলেণ্ডৰ ছেইণ্ট জনছৰ পৰা। ছাবমেৰিনখনত জৰুৰীকালীন পৰিস্থিতিৰ বাবে ৯৬ ঘণ্টাৰ অক্সিজেন মজুত আছিল। বিশেষজ্ঞসকলে অনুমান কৰিছে যে ইতিমধ্যে যথেষ্ট পৰিমাণৰ অক্সিজেন শেষ হৈ গৈছে। চাবমেৰিনখনত আছে ব্ৰিটেইনৰ কোটিপতি ব্যৱসায়ী হামিছ হাৰ্ডিং।
ছাবমেৰিনখনৰ সন্ধানত পৰ্যটন সংস্থা ‘ৱানগেট’ৰ অভিযান চলি আছে। তেওঁলোকেই ছাবমেৰিনত টাইটানিক দৰ্শনৰ আয়োজন কৰিছিল। সংস্থাটোৰ উপৰিও আমেৰিকাৰ ক’ষ্ট গাৰ্ড আৰু কানাডাৰ সেনাইও এই অনুসন্ধানত যোগদান কৰিছে। ইয়াৰ সমান্তৰালকৈ বায়ুসেনাই আকাশী অনুসন্ধানতো সহায় কৰি আছে।
ছাবমেৰিনখন য’ত বিচাৰি ফুৰিছে তাত সাগৰত তিনিৰ পৰা ছয় ফুট ওখ ঢৌ আছে। বতৰৰ পৰিস্থিতি স্বাভাৱিক। কিন্তু ঘন কুঁৱলীৰ বাবে অসুবিধাৰ সন্মুখীন হৈছে উদ্ধাৰকাৰীসকল।
বাতৰি অনুসৰি, ভাৰতীয় মুদ্ৰাত প্ৰতিজন পৰ্যটকৰ টিকটৰ দাম দুই কোটিতকৈও অধিক! পৰ্যটন সংস্থাটোৰ ৱেবছাইটত কোৱা হৈছে যে ২০২৪ চনত তেওঁলোকে টাইটানিক দৰ্শনৰ বাবে দুবাৰকৈ পৰ্যটক লৈ যাব। কিন্তু টাইটানিক জাহাজ দৰ্শনৰ বাবে যোৱাৰ পিছত এতিয়া সেই ‘টাইটান’খনেই নোহোৱা হৈ গ’ল।
উল্লেখ্য যে ১৯১২ চনৰ ১৫ এপ্ৰিলত চাউদাম্পটনৰ পৰা টাইটানিক জাহাজ যাত্ৰা আৰম্ভ কৰে। যোৱাৰ কথা আছিল নিউয়ৰ্কলৈ। কিন্তু প্ৰথম যাত্ৰাতে টাইটানিক জাহাজ এখন বৰফৰ পাহাৰত খুন্দা মাৰি ডুব যায়। বিমানখনত থকা ২২০০ যাত্ৰী আৰু ক্ৰুৰ ভিতৰত ১৫০০ৰো অধিক লোকৰ মৃত্যু হয়।
টাইটানিক জাহাজৰ ধ্বংসাৱশেষ আটলাণ্টিকৰ প্ৰায় চাৰি হাজাৰ মিটাৰ তলত দুটা ভাগত পৰি আছে। ১৯৮৫ চনত প্ৰথমবাৰৰ বাবে এই ধ্বংসাৱশেষ আৱিষ্কাৰ কৰা হৈছিল।
