আজি ১ মে। আজি আন্তঃৰাষ্ট্ৰীয় শ্ৰমিক দিৱস। আজি শ্ৰমিকৰ দিন।
আজি অফিচ–কাছাৰী বন্ধ। আজি কোনেও কাম নকৰে। কিন্তু আজিৰ দিনটো আৰামৰ বাবে নহয়। শ্ৰমিকৰ অধিকাৰ, সুৰক্ষা আৰু সমমৰ্যাদাৰ বাবে কৰা এক দীঘলীয়া সংগ্ৰামৰ স্মৰণ আৰু এই সংগ্ৰামখন আগুৱাই লৈ যোৱাৰ বাবেহে আজিৰ দিনটো পালন কৰা হয়।
মে’ দিৱসৰ ইতিহাস ১৯ শতিকাৰ শেষৰ ফালৰ পৰাই আৰম্ভ হয় যেতিয়া আমেৰিকা আৰু ইউৰোপৰ শ্ৰমিকসকলে উন্নত কৰ্ম পৰিস্থিতি আৰু উচিত দৰমহাৰ বাবে যুঁজি আছিল। ১৮৮৬ চনত চিকাগোত হোৱা হেমাৰ্কেট সংঘৰ্ষৰ ফলত কেইবাজনো শ্ৰমিকৰ মৃত্যু হয় আৰু ইয়াৰ ফলত উন্নত শ্ৰম আইন আৰু সুৰক্ষাৰ বাবে আন্দোলনৰ সূচনা হয়। ১৮৮৯ চনত আন্তঃৰাষ্ট্ৰীয় সমাজবাদী কংগ্ৰেছে হেমাৰ্কেটৰ ছহিদসকলক সন্মান জনোৱাৰ লগতে শ্ৰমিক আন্দোলনৰ কৃতিত্ব উদযাপনৰ বাবে ১ মে’ তাৰিখটোক আন্তঃৰাষ্ট্ৰীয় শ্ৰমিক দিৱস হিচাপে ঘোষণা কৰে।
আজি সমগ্ৰ বিশ্বতে ভিন্ন ধৰণেৰে মে’ দিৱস পালন কৰা হয়। কিছুমান দেশত আজিৰ দিনটোক চৰকাৰী বন্ধ দিন হিচাপে ঘোষণা কৰা হয়। আন কিছুমানত শ্ৰমিকৰ দাবীসমূহ লৈ প্ৰতিবাদ কৰা হয়, সভা অনুষ্ঠিত কৰা হয়। শ্ৰমিকৰ স্বাৰ্থৰ বাবে আজিৰ দিনটোত বিভিন্ন দেশত সমদল উলিওৱা হয়।
বহু দেশত মে’ দিৱস শ্ৰমিকৰ অধিকাৰৰ লগতে এক সংস্কৃতি হিচাপেও উদযাপন কৰা হয়। কিয়নো বসন্তৰ আগমন আৰু জীৱনৰ নবীকৰণৰ লগত ইয়াৰ সম্পৰ্ক আছে। কিছুমান দেশত ইয়াক নৃত্য আৰু গীতৰ দ্বাৰা মে দিৱস উদযাপন কৰা হয়। এই উদযাপনৰ সম্পৰ্ক উৰ্বৰতাৰ লগত। বহু ঠাইত ভোজ–ভাত, পৰম্পৰাগত খাদ্য আৰু পানীয়ৰ দ্বাৰা মে দিৱস উদযাপন কৰা হয়।
