আসন্ন লোকসভা নিৰ্বাচনত ত্ৰিপুৰাৰ বিজেপি মিত্ৰজোঁট আইপিএফটিয়ে লোকসভা নিৰ্বাচনত নিজাববীয়া প্ৰতিদ্বন্দ্বিতা আগবঢ়াব। শনিবাৰে দলটোৰ কেন্দ্ৰীয় সমিতিৰ এখন জৰুৰী বৈঠকৰ পাছত এখন সংবাদমেলৰ জৰিয়তে দলৰ নেতৃত্বই এই কথা ঘোষণা কৰে।
আইপিএফটিৰ সভাপতি এন চি দেববাৰ্মা আৰু সাধাৰণ সম্পাদক মেৱৰ কুমাৰ জামাতিয়াৰ ধৰি দলৰ জ্যেষ্ঠ নেতৃত্ব শনিবাৰে সন্ধিয়া দশৰথ দেব হলত অনুষ্ঠিত সংবাদমেলখনত উপস্থিত থাকে।
জামাতিয়াই কয় যে তেওঁলোকে এক জনজাতীয় দল হিচাপে বিজেপিক অনুসূচিত জনজাতিৰ বাবে সংৰক্ষিত ৰাজ্যখনৰ দুটা সমষ্টিৰ এটা পূব ত্ৰিপুৰা সমষ্টিটো এৰি দিয়াৰ বাবে আহ্বান জনাইছিল যদিও বিজেপিয়ে তেওঁলোকৰ প্ৰস্তাৱ গ্ৰহণ নকৰিলে।
এনেকুৱা পৰিস্থিতিত তেওঁলোকে দলৰ সমৰ্থকসকলৰ আবেগক সন্মান জনাই দুয়োখন আসনতে প্ৰতিদ্বন্দ্বিতা কৰাৰ বাহিৰে আন বিকল্প নাই।
তেওঁ পূব ত্ৰিপুৰাৰ পৰা প্ৰতিদ্বন্দ্বিতাৰ বাবে এন চি দেববাৰ্মাৰ নাম আৰু পশ্চিম ত্ৰিপুৰাৰ বাবে শুক্লা চৰণ নোৱাটিয়াৰ নাম প্ৰাৰ্থী হিচাপে ঘোষণা কৰে।
জামাতিয়াই জানিবলৈ দিয়ে যে তেওঁলোকে এতিয়াও বিজেপিৰ বাবে আলোচনাৰ দুৱাৰ খোলা ৰাখিছে আৰু যদি বিজেপিয়ে পূব ত্ৰিপুৰাৰ পৰা ইয়াৰ প্ৰাৰ্থিত্ব প্ৰত্যাহাৰ কৰে তেতিয়াহ’লে আইপিএফটিয়ে পশ্চিম ত্ৰিপুৰৰ পৰা ইয়াৰ প্ৰাৰ্থিত্ব প্ৰত্যাহাৰ কৰিব।
জামাতিয়াই অৱশ্যে ইয়াৰ বাবে বিজেপি-আইপিএফটিৰ মিত্ৰতাত প্ৰভাৱ পৰা কথা অস্বীকাৰ কৰে।
ইয়াৰ মাজতে বিজেপিৰ নতুন দিল্লীত শনিবাৰে সংসদীয় সমিতিৰ বৈঠক অনুষ্ঠিত হে যায় আৰু ত্ৰিপুৰাৰ লোকসভা আসন দুখনৰ বাবে প্ৰাৰ্থীৰ নাম শীঘ্ৰেই ঘোষণা কৰাৰ সম্ভাৱনা আছে।
